اس میں کوئی شک نہیں کہ انسان کے اچھے برے افعال بلکہ ارادے اور خیالات کے پیدا کرنے والے اللہ تبارک و تعالی ہیں، لیکن یہ بھی ایک حقیقت ہے کہ اللہ تبارک و تعالی نے انسان کو اینٹ یا پتھر کی طرح بے بس اور بے اختیار نہیں بنایا، بلکہ اسے اختیار دے رکھا ہے جسے وہ اپنی زندگی میں آزادانہ طور پر استعمال کرتا ہے۔ اور اپنی مرضی سے کوئی کام کرتا ہے تو کوئی کام چھوڑتا ہے۔ جیسے کسی شخص کو بھرا ہوا پستول ملا اور اس نے خدانخواستہ فائر کر کے اپنے سامنے موجود آدمی کو قتل کر دیا تو ہر شخص اس فائر کرنے والے کو مجرم اور قاتل قرار دیتا ہے ، پستول یا گولی بنانے والے کو قاتل نہیں قرار دیا جاتا حالانکہ گولی چلانے والے نے نہ تو پستول بنایا اور نہ ہی پستول کا کوئی پرزہ، نہ گولی بنائی اور نہ ہی گولی کا کوئی ذرہ، کسی چیز کو بنانے میں اس کا کوئی عمل دخل نہیں، اس نے صرف اپنی انگلی کی معمولی حرکت سے گولی چلائی ہے۔ لیکن اس کے باوجود اسے قاتل قرار دیا جاتا ہے کیونکہ اس نے اپنے اختیار سے یہ عمل کیا ہے اگر وہ چاہتا تو گولی نہ چلاتا۔ بالکل اسی طرح یہ بات بھی سمجھنی چاہیے کہ بلاشبہ انسان ، اس کے ارادے اور اعمال کا خالق اللہ تعالی ہے لیکن انسان جو بھی عمل کرتا ہے اپنے اختیار سے کرتا ہے۔ نماز ، روزہ، زکوۃ، حج اور دیگر نیک اعمال یا گناہ کے کام اپنے اختیار سے سر انجام دیتا ہے، اللہ کی طرف سے مجبور نہیں کیا جاتا۔ نہ گناہ مجبور ہو کر کرتا ہے اور نہ ہی نیکی۔ اذان کی آواز سن کر جو لوگ مسجد جاتے ہیں وہ بھی اپنے اختیار سے جاتے ہیں، اور جو لوگ اپنے دنیوی کاروبار میں مصروف رہتے ہیں وہ بھی اپنے اختیار سے ایسا کرتے ہیں، اسی اختیار پر اللہ تبارک و تعالی بندوں کو ثواب و عذاب عطا فرمائیں گے۔ مسئلہ تقدیر کو سمجھنے کے لیے مفتی اعظم پاکستان حضرت مولانا مفتی محمد رفیع عثمانی صاحب مد ظلہ کی کتاب ” مسئلہ تقدیر کا آسان حل اور عقیدہ تقدیر پر ایمان کے فوائد ” مطبوعہ ادارۃ المعارف کراچی کا مطالعہ کیا جا سکتاہے)