اولاد کے لیے اپنے والدین کی سرپرستی کے بغیر خود ہی جاکر عدالت میں نکاح کر لینا شرعا پسندیدہ عمل نہیں ۔بلکہ بعض صورتوں میں نکاح سرے سے منعقد ہی نہیں ہوتا ،لہٰذا اولاد کو چاہیے کہ وہ رشتوں کے سلسلے میں اپنے بڑوں کی رائے کا احترام کریں اور ان کی سرپرستی میں شادی کریں۔ لیکن اگر وہ ایسا کوئی اقدام کر لیتے ہیں تو ایسی صورت میں لڑکے کے خاندان پر جرمانہ عائد کرنا اور ان سے بائیکاٹ کرنا درست نہیں؛ کیونکہ ایک تو لڑکے کے عمل کی سزا اس کے خاندان پر ڈالنا درست نہیں اور دوسرے یہ کہ اگر خاندانوں کو ہی مجرم ٹھہرانا ہے تو لڑکی کے خاندان کو کیوں مجرم نہیں ٹھہرایا جارہا ؟جبکہ لڑکی بھی اس اقدام میں برابر کی شریک ہے۔ اس لیے جُرمانہ وصول کرنے یا بائیکاٹ کرنے کے بجائے اس طرح کے اقدامات کی روک تھام کا طریقہ یہ ہے کہ بچوں ، بچیوں کے لیے مناسب رشتہ ملنے پر بلا وجہ ان کی شادی میں تاخیر نہ کی جائے اور والدین اپنی انا یا معاشرے کے طعنوں کو رکاوٹ نہ بنائیں، بلکہ اپنی ذمہ داری نبھاتے ہوئے بہتر رشتوں کو رد نہ کریں۔