نمبر۱۔واضح رہے کہ صریح طلاق کے الفاظ سے طلاق واقع ہونے کے لیے طلاق اور اس کی تعداد کی نیت کا پایا جانا ضروری نہیں۔ کسی بھی نیت سے طلاق کے صریح الفاظ جتنی تعداد کے ساتھ کہے جائیں تو ان سے اتنی طلاقیں واقع ہوجاتی ہیں ۔ لہذا صورتِ مسئولہ میں جب آپ نے تین طلاقیں دے دیں تو آپ کی بیوی پر تینوں طلاقیں واقع ہوکر حرمت غلیظہ ثابت ہوگئی ہے۔ اور آپ دونوں ایک دوسرے پر حرام ہوچکے ہیں۔ اب آپ کےلیے ایک ساتھ رہنا جائز نہیں۔ موجودہ صورتِ حال میں نہ تو آپس میں رجوع کرسکتے ہیں اور نہ ہی نکاح کرکے اکٹھے رہ سکتے ہیں۔ البتہ اگر خاتون عدت طلاق گزارنے کے بعد کسی دوسرے شخص سے نکاح کرلے اور ہم بستری بھی ہوجائے اور پھر دوسرے شخص کا انتقال ہوجائے یا وہ کسی وجہ سے اسے طلاق دے دے تو عدت گزرنے کے بعد آپ اس عورت کے ساتھ اس کی رضامندی سے نئے مہر کے عوض نیا نکاح کرسکتے ہیں، نیز واضح رہے کہ بغیر کسی ضرورت کے محض تحلیل کی شرط پر دوسری جگہ شادی کرنا ناجائز اور گناہ ہے۔(ماخذہ :تبویب فتاوی دارالعلوم 9/189،فتاوی دارالعلوم دیوبند 9/238)