میری بیوی بغیر اجازت کے لاہور سے اٹک اپنی بیٹی کے پاس چلی گئی، دوپہر کو جب میں دکان پر تھا اس نے مجھ سے اجازت مانگی تھی لیکن میں نے اسے اجازت نہیں دی، جب میں دوکان سے رات کو گھر آیا تو وہ بغیر اجازت کہ جا چکی تھی، میں نے اس کو فون کیا تو وہ وہاں پر پہنچ چکی تھی، میں نے اسے غصے میں کہا اگر تو نے گھر میں دوبارہ قدم رکھا تو تجھے تین طلاق لیکن اگلے ہی لمحے میں نے اسے کہا تو صبح پہلی گاڑی سے واپس آجا، وہ آگئی۔ مذکورہ صورت میں دوبارہ صلح کے لئے کیا طریقہ کار اختیار کیا جا سکتا ہے؟
مذکورہ صورت میں اس جملہ ”اگر تو نے گھر میں دوبارہ قدم رکھا تو تجھے تین طلاق” کی وجہ سے آپ کی بیوی کی تین طلاقیں گھر میں داخل ہونے کے ساتھ معلق (موقوف ) ہو گئی تھیں؛ لہذا جب اگلے ہی لمحہ آپ نے اسے صبح آنےکو کہا اور وہ گھر واپس آگئی تو ایسی صورت میں تین طلاقیں واقع ہو کر حرمت مغلظہ ثابت ہو گئی ہے اور آپ دونو ں کا نکاح ختم ہو گیا ہے۔ اب موجودہ صورتِ حال میں آپ دونو ں ایک دوسرے کے لیے اجنبی بن چکے ہیں؛ لہذا آپ کے لیے ایک ساتھ رہنا جائز نہیں نہ تو آپس میں رجوع کر سکتے ہیں اور نہ ہی نیا نکاح کر کے اکٹھے رہ سکتے ہیں، البتہ اگر عورت عدت طلاق گزارنے کے بعد کسی دوسرے شخص سے نکاح کرے اور ہم بستری بھی ہو جائے پھر دوسرے شوہر کا انتقال ہو جائے یا وہ کسی وجہ سے اسے طلاق دے دے تو عدت گزرنے کےبعد آپ دونوں باہمی رضا مندی سے آپس میں شادی(نکاح) کر سکتے ہیں ۔