مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
بارش میں کپڑوں اور جسم پر لگنے والے پانی کی چھینٹوں سے متعلق مختلف صورتوں کا جواب(مفصل ومدلل)
سوال
اگر کوئی شخص راستے پر چل رہا ہو اور اس کے کپڑوں پر بارش کے چھینٹے لگیں تو وہ کتنی مقدار میں معاف ہیں،اور اگر گندا پانی مثلاً : گٹر وغیرہ کا پانی بھی ہو تو اس کا کیا حکم ہے ۔اس کے چھینٹے اگر کپڑوں پر لگ جائیں تو ان کا کیا حکم ہے ؟
جواب
بارش کے پانی کی چھینٹوں کا حکم
آپ کے سوال کے جواب میں عرض ہے کہ بارش یا سڑک پر جمع شدہ بارش کے پانی کی مختلف صورتیں ہو سکتی ہیں، اور ان کے احکامات مختلف ہیں ،اس لیے تفصیل سے ان کے احکام ذیل میں ملاحظہ فرمائیے:
نمبر۱۔بارش کا پانی راستوں پر جمع ہوجائے اور اس میں گٹر کے پانی یا دیگر نجاستوں کی آمیزش نہ ہو تو وہ پانی پاک ہے ،اگر اس کی چھینٹیں جسم یا کپڑوں پر لگ جائیں تو اس کو پا ک ہی سمجھا جائے گا اور نماز اور دیگر عبادات اس کے ساتھ درست ہو جائیں گی ۔
نمبر۲۔ اگر بارش کے پانی میں ناپاک پانی مل جائے اور دونوں مل کر اتنی مقدار میں بہہ پڑیں کہ جس سے ناپاکی کا اثر ختم ہو جائے یعنی نجاست کا رنگ، بو یا مزہ اس پانی میں نہ رہے جیسا کہ تیز بارش میں نشیبی راستوں میں ہوتا ہے تو یہ پانی ماء جاری کے حکم میں ہونے کی وجہ سے پا ک ہوگا ۔
نمبر۳۔بارش کے پانی میں گٹر کا پانی یا کوئی اور نجاست مل جائے اور وہ ایک جگہ جمع ہو بہہ نہ رہا ہو ، اس پانی کا پھیلاؤ پندرہ بائی پندرہ فٹ151×151( یعنی 225 مربع فٹ) سے زیادہ ہو اور اس پانی میں نجاست کا اثر (رنگ ،بو یا مزہ) غالب نہ ہو تو یہ پانی بھی پاک ہے ۔
نمبر۴۔ بارش کے پانی میں نجاست مل گئی ہو اور وہ جاری نہ ہو،ایک جگہ جمع ہو اور اس پانی کا پھیلاؤ پندرہ بائی پندرہ فٹ151×151( یعنی 225 مربع فٹ) سے کم ہوتو یہ پانی ناپاک ہے اگرچہ اس میں نجاست کا اثر(رنگ ، بواور ذائقہ) اس میں ظاہر نہ ہوا ہو ۔
نمبر۵۔اگر بارش کے پانی میں نجاست مل جائے او ر اس کا اثر (رنگ ،بو یا ذائقہ) اس پانی پر غالب آجائے تو وہ پانی ناپاک ہے اور اس کی چھینٹیں بھی ناپاک ہیں، اگرچہ وہ پانی جاری ہو یا جمع ہونے کی صورت میں اس کا پھیلاؤ پندرہ بائی پندرہ فٹ فٹ151×151(یعنی 225 مربع فٹ) سےزائد ہو ،اور ناپاک چھینٹوں کے ساتھ نماز پڑھنے کی تفصیل آخر میں مذکور ہے ۔
لہذا جن صورتوں میں پانی ناپاک ہےان کا حکم یہ ہے کہ اگر پانی کی چھینٹیں سوئی کے ناکے کے برابر چھوٹی ہوں تو وہ معاف ہیں، اسی طرح جسم یا کپڑوں کے مختلف حصوں پر چھینٹیں لگیں اور ان سب کا مجموعی پھیلاؤ ایک درہم کے برابر یا اس سے کم ہوتو ان کو دھونا بہتر ہے ، بغیر دھوئے بھی نماز پڑھ لی تو نماز ادا ہو جائے گی۔ البتہ چھینٹوں کا پھیلاؤ درہم کے برابر ہو نے کی صورت میں ان کو دھوئے بغیر نماز پڑھ لی تو نماز کراہت کے ساتھ ادا ہو گی ،اور اگر چھینٹیں ایک درہم سے زیادہ ہوں تو ان کو دھو کر نماز پڑھنا ضروری ہے بغیر دھوئے نماز درست نہیں ہوگی ۔ تاہم جہاں بارشیں زیادہ ہوتی ہوں اور کسی شخص کو بار بار ایسے راستے سے گزرنے کی حاجت ہو اور جسم و کپڑوں کو بچانا بہت مشکل ہو اور بار بار دھونے میں حرجِ شدید ہو تو ایسی صورت میں نجس پانی کے چھینٹے اس شخص کے حق میں معاف ہیں۔بشرطیکہ کپڑوں پر نجاست کا اثر بعینہ نظر نہ آئے ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں