مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
حالت نماز میں شلوار کو نیچے سے یا اوپر سے فولڈ کرنا اور ٹخنے ڈھانپنے کا حکم
سوال
ایک آدمی کا یہ کہنا شلوار کو نیچے سے یا اوپر سے فولڈ کرنا مکروہ تحریمی ہے اور اس سے ادا کی گئی نماز واجب الاعادہ ہے۔ اور بازوں سے کہنیوں تک کپڑا نیچے نہ کیا ہوتو اس سے بھی نماز مکروہ تحریمی ہوگی اور واجب الاعادہ ہوگی اور اگر ایک بَل یا آدھی آستین ہوتو اتنی مقدار معاف ہے اس سے نماز میں کوئی فرق نہیں پڑےگا۔
دلیل نمبر۱۔ یہ حدیث پیش کرتاہے کہ حضورﷺ نے فرمایاکہ مجھے سات ہڈیوں پر سجدہ کرنے کا حکم دیاگیاہے دو ہاتھ ،دوپاؤں ،دو گھٹنےاور پیشانی کا زمین پر لگنا فرض ہے اور ناک کازمین پر لگنا واجب ہے ۔اور اپنے بالوں اور کپڑوں کو نہ سمیٹوں ۔
دلیل نمبر ۲۔ ٹخنے ڈھانپنا مکروہ تنزیہی ہے اور مکروہ تنزیہی کی وجہ سے مکروہ تحریمی کا ارتکاب نہیں کرنا چاہیے۔بلکہ اس لئے کہ مکروہ تحریمی کے ارتکاب کی وجہ سے نماز واجب الاعادہ ہوجاتی ہے۔
اس کے بارےمیں راہ فرمائیں کہ آیا اس طرح کرنے سے واقعی نماز مکروہ تحریمی اور واجب الاعادہ ہوتی ہے یا نہیں نیزکیا ٹخنے ڈھک کر نماز پڑھنا بہتر ہے یا کپڑےکو فولڈ کرکے ٹخنےکو ننگا کرکے نماز پڑھنا بہتر ہے۔
جواب
شلوار کے پائنچے بقصدِ تکبر ٹخنوں سے نیچے رکھنا حرام ہے ،اور بلا قصدِ تکبر خواہ نماز میں ہو یا خارج نماز مکروہِ تحریمی ہے۔اگر غیر ارادی طور پر شلوار کا پائنچہ ٹخنوں سے نیچے ہو جائے تو معاف ہے،اور نماز میں اس امر کی شناعت مزید بڑھ جاتی ہے ۔ ابو داؤد شریف میں حضرت ابو ہریرہ رضی اللہ عنہ سے مروی ہے کہ
بينما رجل يصلي مسبلا إزاره إذ قال له رسول الله صلى الله عليه وسلم: «اذهب فتوضأ»، فذهب فتوضأ، ثم جاء، ثم قال: «اذهب فتوضأ»، فذهب فتوضأ، ثم جاء، فقال له رجل: يا رسول الله ما لك أمرته أن يتوضأ، ثم سكت عنه، فقال: «إنه كان يصلي وهو مسبل إزاره وإن الله تعالى لا يقبل صلاة رجل مسبل إزارہ.
ترجمہ:ایک شخص اپنا تہبند لٹکا کر نماز پڑھ رہا تھا آپﷺ نے اس سے فرمایا کہ جاؤ وضو کر کے آؤ،وہ شخص جا کے وضو کر کے آگیا ،آپ ﷺ نے پھر فرمایا کہ جاؤ وضو کر کے آؤ وہ پھر جا کر وضو کر کے آیا ،تو کسی نے کہا: اے اللہ کے رسول ! آپ نے اس آدمی کو وضو کر کے آنے کا حکم کیوں دیا؟ آپ ﷺ نے فرمایا کہ یہ شخص تہبند لٹکائے نماز پڑھ رہا تھا ،اور یقیناً اللہ ایسے شخص کی نماز قبول نہیں کرتے جو تہبند لٹکائے ہوئے ہو۔
مذکورہ حدیث میں نماز کے اندر کپڑا ٹخنوں سے نیچے لٹکانے والے کے بارے میں سخت وعید آئی ہے،لہذا جن احادیث سے نماز میں کپڑا سمیٹنے کی ممانعت معلوم ہوتی ہے ان کی مراد شراح ِحدیث نے واضح کرتے ہوئے فرمایا: اس سے مراد کپڑے کو مٹی سے بچانے کے لئے سجدے میں جاتے ہوئے کپڑے کو سمیٹ لینا ہے اور یہی تکبر کی علامت بھی ہے۔
لہذا سوال میں ذکر کردہ حدیث سے اس پر استدلال کرنا کہ نماز میں ٹخنے ننگے کرنے کے لئے شلوار وغیرہ کو فولڈ کرنا مکروہِ تحریمی ہے” درست نہیں ۔اور رہی بات پینٹ کو نیچے سے فولڈ کرنے کی تو اگرچہ وہ لباس کی اصل ہئیت کے خلاف ہے لیکن چونکہ ٹخنے ڈھانپنے کی وعیدیں شدید ہیں لہذا “اھون البلیتین ” کے درجے میں رکھتے ہوئے فولڈکرنا بہتر ہے۔
نیز جس مکروہِ تحریمی کے ارتکاب سے نماز واجب الاعادہ ہوتی ہے اس سے مراد یہ ہے کہ نماز کے دوران کسی داخلی عمل(مثلاً: ترکِ واجب) کی وجہ سے کراہت تحریمی پیدا ہوئی ہو ،تو ایسی نماز کا اعادہ واجب ہے،لیکن اگر نماز سے خارج کسی امر (مثلاً: فاسق کو امام بنانا )کی وجہ سے نماز میں کراہت ، تحریمی پیدا ہوئی ہو تو ایسی صورت میں نماز کا اعادہ واجب نہیں لہذا صورتِ مسئولہ میں نماز کے لئے شلوار وغیرہ فولڈ کرنا مکروہِ تحریمی ہی نہیں اور اگر مکروہِ تحریمی مان بھی لیا جائے تو یہ ایسا مکروہِ تحریمی نہیں کہ جس سے نماز واجب الاعادہ ہو۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
