مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
معذور شخص کےلئے کرسی پر نماز پڑھنے کا حکم
سوال
آج کل مساجد میں کرسیوں پر نماز پڑھنے کا بہت رواج ہو گیا ہے صحیح طرح چلنے پھرنے والے حضرات بھی کرسی پر نماز ادا کرتے ہیں اور مزید یہ کہ ان کی خواہش یہ ہو تی ہے کہ سٹول کے بجا ئے اچھی اور آرام دہ کرسی پر نماز پڑھیں ،کیا اس طرح سے نماز ادا کرنا ٹھیک ہے؟
جواب
جو شخص قیام پر قادر نہیں لیکن زمین پر بیٹھ کر نماز ادا کرسکتا ہے تو اس کو زمین پر بیٹھ کر نماز ادا کرنا چاہیے ایسے شخص کے لیے کرسی پر نماز اداکرنا درست نہیں کیو ں کہ شریعت نے ایسے معذورین کو زمین پر بیٹھنے کے سلسلے میں مکمل رعایت دی ہے کہ جس ہیئت میں ممکن ہو بیٹھ کر نماز اداکرے اس صورت میں بلا ضرورت کرسیوں پر بیٹھ کر نماز ادا کرنا چند وجوہات کی وجہ سے مکروہ ہے۔
نمبر۱۔زمین پر بیٹھ کر ادا کرنا مسنون طریقہ ہے اسی پر صحابہ کرام رضي الله عنهم اوربعد کے لوگوں کا عمل رہا ہے ، کچھ عرصہ قبل تک کرسیوں پر بیٹھ کر نماز ادا کرنے کا رواج نہیں تھا ، نہ ہی خیرالقرون سے اس طرح کی نظیر ملتی ہے۔
نمبر۲۔ کرسیوں کے بلا ضرورت استعمال سے صفوں میں بہت خلل ہو تا ہے ؛ حالانکہ صفوں کی درستگی کی حدیث میں بہت تاکید سے آئی ہے۔
نمبر۳۔ بلاضرورت کرسیوں کو مساجد میں لانے سے مذاہب باطلہ کی عبادت گاہوں سے مشابہت ہو تی ہے اور دینی امورمیں ہم کو غیر وں کی مشابہت سے منع کیا گیا ہے۔
نمبر۴۔ نماز اللہ تعالی ٰ کی عظیم ہستی کے سامنے بندے کی بندگی، عاجزی وانکساری کا نام ہے اور بلا ضرورت کرسی پر نماز پڑھنے کی صورت میں یہ مقصد فوت ہو جا تا ہے کیوں کہ کرسی پر بیٹھنے کی حالت عموما ً عاجزی وانکساری کی نہیں ہو تی جبکہ زمین پر ادا کرنے میں یہ انکساری بدرجہ اتم پا ئی جاتی ہے۔
نمبر۵۔ نماز میں زمین سے قرب ایک مطلوب شے ہےجو کرسیوں پر اداکرنے میں حاصل نہیں ہوتا۔
نمبر۶۔ آرام دہ کرسی پر بیٹھنے سے عموما نیند اور غفلت کا غلبہ ہوجا تا ہے اوریہ نیند بعض صورتوں میں وضو کے ٹوٹنے کا سبب بھی بن جاتی ہے ۔
البتہ اگر زمین پر کسی بھی ہیئت میں بیٹھ كر نماز اداکرنا دشوار ہو جائے ،مثلا ً گھٹنے نہ مڑتے ہو یا کمر میں تکلیف کی وجہ سے کسی ماہر دیندار ڈاکٹر نے منع کیا ہو یا بیٹھنے کی صورت میں قیام نہ کر سکتا ہو اور کرسی پر بیٹھنے کی صورت میں کر سکتا ہو تو پھر کرسیوں پر ضرورت کی وجہ سے نماز اداکی جاسکتی ہے لیکن اس مجبوری میں بھی اس بات کا خیال رکھا جائے کہ ہمیشہ سٹول یا چھوٹی کرسی ہی استعمال کی جائے جو صرف ضرورت کو پور ا کرے اور صف بندی میں بھی سہولت رہے ، البتہ اگر چھوٹی کرسی پر بیٹھنا دشوار ہو تو ضرورت کے وقت بڑی کرسی استعمال کی جاسکتی ہے۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
