نمازیوں کی تعداد زیادہ ہونے کی وجہ سے جونمازی مسجد سے باہر نماز اداکرتے ہیں ان کے لئے ضروری ہے کہ ان کی صفیں مسجد کی صفوں سے متصل ہوں البتہ یہ بات واضح رہے کہ ہر ہر صف کا مسجد سے متصل ہونا ضروری نہیں بلکہ اگرمسجد کی کسی ایک جانب سے(مشرق، شمال اور جنوب میں سے کسی بھی جہت سے) صفیں مسجد کی صفوں سے ملی ہوئی ہیں اور نمازیوں اور مسجد کے درمیان دوصفوں سے کم فاصلہ ہے اور باقی اطراف کی صفیں ان صفوں سے ملی ہوئی ہیں تو ان سب لوگوں کی نماز درست ہوجائے گی ۔لہذا اس طریقے کے مطابق اتصال قائم کرکے اداکی گئیں نمازیں درست ہوگئیں اور جن نمازیوں نے مذکورہ طریقے پر اتصال قائم کئے بغیر نمازیں اداکی ہیں ان کی نمازیں ادانہیں ہوئیں نیز واضح رہے کہ باہر نماز اداکرنے والے نمازی خود اتصال قائم کرنے کے ذمہ دار ہیں انتظامیہ ذمہ دار نہیں ، ہاں اگر انتظامیہ کی طرف سے کوئی رکاوٹ تھی تو اس کی تفصیل لکھ کردوبارہ حکم معلوم کرلیں۔