مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
بريلوی،مماتی،غيرمقلد امام كی اقتداء
سوال
اکثرتبلیغی جماعت والوں کی تشکیل بریلویوں کی مساجدمیں ہوتی ہےاوریہ حضرات وہاں جاکر بریلوی امام کی اقتداء میں نمازپڑھتےہیں، حالانکہ فتاوی محمودیہ ،مفتی محمودحسنؒ گنگوہی(6/261،باب الامامۃ،ط:فاروقیہ) میں اوراحسن الفتاوی (10/32) اور خیرالفتاوی،مفتی خیرمحمدجالندھریؒ(2/326،باب مایتعلق بالامامۃ والجماعۃ،ط:امدادیہ) میں لکھاہواہےکہ بریلوی امام کےپیچھےنمازپڑھنامکروہ تحریمی اورواجب الاعادہ ہے۔اب دریافت طلب امریہ ہےکہ تبلیغی جماعت والوں کابریلوی امام کی اقتداءمیں نماز پڑھناجائزہےیانہیں ؟ اگرجائزہےتوکیاجس مسلک کی مسجدمیں بھی تشکیل ہوگی تواس امام کی اقتداء میں نمازپڑھناجائزہوگایانہیں ،مثلاً:بریلوی ،مماتی اورغیرمقلدوغیرہ۔اگران سب کی اقتداءمیں نمازپڑھنادرست نہیں توجواسےدرست کہے،اس کےمتعلق کیاحکم ہے؟
جواب
الف۔۔۔بريلوی حضرات کے عقائد عام طور پرمشرکانہ نہیں ہوتے، کیونکہ جن عقائد میں وہ اہل السنت والجماعت سے ہٹے ہوئے ہیں ان میں وہ تاویل کرتے ہیں اوربالکل اللہ تعالیٰ کی طرح حضورﷺکوہرجگہ حاضر ناظر،مختار کل اور عالم الغیب نہیں مانتے بلکہ ذاتی اور عطائی کا فرق کرتے ہیں اس لئے علماء نے انہیں کافرنہیں کہاہے بلکہ وہ بدعتی اور فاسق ہیں(ملاحظہ فرمائیں فتاوی دارالعلوم دیوبند،مفتی عزیزالرحمن (3/247)فصل ثالث:کس کی امامت درست ہےاورکس کی نہیں’’امداد المفتین ،مفتی محمدشفیع،ط:دارالاشاعت،ص:138‘‘اورفتاوی دارالعلوم کراچی یعنی امداد السائلین،مفتی محمدشفیع صاحب ؒ ص241،ط:ادارۃ المعارف کراچی)اس لئے انہیں اپنے اختیار سے امام بنانا مکروہ ِ تحریمی اور ناجائز ہے، اور بااختیار آدمی پر بدعتی امام کوامامت سے ہٹانالازم ہے۔ البتہ اگر اسے امام بنانے یاامامت سے ہٹانے میں کوئی اختیاریا عمل دخل نہ ہواور کسی صالح اور صحیح العقیدہ امام کے پیچھے دوسری جماعت بھی بہ آسانی میسر نہ ہوتو تنہانماز پڑھنے کے مقابلے میں بریلوی امام کے پیچھے ہی نماز پڑھناافضل ہے۔
مذکورہ تفصیل اس وقت ہے جب بریلوی امام کا عقیدہ کفر وشرک کی حد تک پہنچا ہوا نہ ہويااس کامذہب مشتبہ نہ ہو،لیکن اگر یہ بات یقین سے معلوم ہوجائے کہ اس کا عقیدہ کفر وشرک کی حد تک پہنچا ہوا ہےتو اس کے پیچھے نماز نہیں ہوگی، اوراگر اس كی عبارات یاگفتگو کی روشنی میں اس کا مذہب مشتبہ ہوگیاہو تواس کے پیچھے نمازاداکرنے کے حوالے سے احتیاط ضروری ہے ،تاہم واضح رہےکہ جن اکابرنے بریلوی امام کی اقتداءمیں اداکی گئی نمازکوواجب الاعادہ فرمایاہے وہ اسی صورت میں ہے جب اس کاعقیدہ کفریہ یامذہب مشتبہ ہوگیاہو۔
ب۔۔۔ غیر مقلد امام كے بارے میں اگر یقین یاظن غالب سے معلوم ہوکہ وہ حنفی مذہب کے مطابق نمازكے ارکان وشرائط کی رعایت کرتاہے تو اس کی اقتداء میں نمازاداکرنابلاکراہت درست ہے بشرطیکہ ائمہ کوبرابھلانہ کہتاہواورتقلیدکوشرک نہ سمجھتاہو۔وراگر یقین یاظن غالب ہو کہ وہ حنفی مذہب کے مطابق پاکی ناپاکی کےمسائل کا خیال نہیں رکھتا، مثلاً خون نکل کر بہہ جانے کی صورت میں نماز کے لئے وضو نہیں کرتا، اسی طرح دهاگہ کی جرابوں پر مسح کرتا ہےتواس کے پیچھے نماز ادا نہیں ہوتی اورجس كے بارے میں شک ہو،اس کی اقتداء مکروہ ہے؛ اس لئےعام حالات میں اس کے پیچھے نماز ادا کرنے سے بچنا چاہئے لیکن مجبوری کی صورت میں (جہاں قریب میں دوسری جماعت میسر نہ ہو)تنہا نماز پڑھنےکی بجائے جماعت کی فضیلت حاصل کرنے کے لئے مذکور امام کی اقتدا میں نمازپڑھ لینا بہتر ہے ۔
ج۔۔۔جوامام حیات النبی ﷺ كابالكليہ انکار نہ کرتاہوبلكہ نفسِ حیات مبارکہ کاقائل ہو،البتہ اس کی مزید تفصیلات سے سکوت کرتا ہویا ان تفصیلات میں اہل سنت والجماعت علماء دیوبندسے اختلاف کرتا ہوتواس کی اقتداء میں نمازبلاكراہت ادا ہوجاتی ہےبشرطیکہ اس میں کراہت کی کوئی اور وجہ نہ ہو،البتہ جوامام حیات ِ مبارکہ کا بالکل منکر ہو اس کی اقتداء میں نماز اداکرنےمیں احتیاط ضروری ہے
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
