مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
وکیل کیس کی فیس پہلے وصول کرے اور فیصلہ سے پہلے انتقا ل ہوجائے ۔
سوال
ہمارے والد محترم وکالت کے پیشہ سے وابستہ تھے ابھی تین ہفتہ پہلے وبائی مرض ( کرونا ) میں ان کا انتقال ہو گیا ، وہ دین کے معاملے میں بہت چست تھے، صوم و صلوۃ اور تلاوت واذ کار کے بہت پابند تھے، آخری وقت یسین شریف پڑھی اور ذکر فکر کرتے ہوئے دنیا سے رخصت ہو گئے۔
الغرض – والد محترم اینٹی کرپشن اور کریمنل کیس کے چار اضلاع میں بہت ہو نہار، ہوشیار اور نامور وکیل تھے ، اور پچھلے چالیس سال سے اس پیشے سے وابستہ رہے، سوال یہ ہے کہ والد مرحوم کے پاس فی الحال سو سے زائد فائل پینڈنگ ہے، جن لوگوں کے مقدمہ لئے ہوئے ہیں اور ان سے کچھ نہ کچھ فیس وصول کی ہے جیسے جیسے کیس ہوتے اسی حساب سے فیس وصول کرتے رہتے تھے ۔ اور یہ فیس ہمارے اندازے کے مطابق بہت بڑی رقم ہوتی ہے، اور جو فیس لی ہے اس کا کوئی ثبوت بھی نہیں ہے اور بعض فائلوں پر کوڈ ورڈ میں لکھا ہوا ہے جس کا سمجھنا بہت ہی مشکل ہے، کچھ مقدمہ پچاس فیصد کچھ اسی فیصد چل چکے ہیں ،اور کچھ ابھی ابتدائی مرحلے میں ہیں۔
اب اصل مسئلہ یہ ہے کہ جن اصیلوں نے فیس جمع کی ہے ان کی فیس لوٹائی جائے یا نہیں ؟ اس سلسلہ میں وکلاء کی جماعت سے بات چیت کی گئی، جو والد مرحوم کے ہمدرد اور دوست ہیں، تو انہوں نے بتایا کہ ہمارے وکالت کے پیشے میں فیس وصول ہونے کے بعد کیس چلنے لگے ، فائل بن جائے اور وکیل کا انتقال ہو جائے تو فیس واپس نہیں کی جاتی ، ان کا کہنا ہے کہ ہم کیس کی فائل تیار کر کے ان کا مطالعہ کرتے ہیں اور ہائی کورٹ اور سپریم کورٹ کے کئی فیصلے جو ہمیں کام آسکتے ہے بڑی محنت کر کے وقت کی قربانی دیکر معین وکلاء کی مدد سے تیار کرتے ہیں ۔یہ سب کام کورٹ میں مدت پر حاضر ہونے سے پہلے ہوتے ہیں، حاصل یہ ہےکہ مسلم و غیر مسلم وکلاء کی رائے کے مطابق فیس واپس نہیں کی جاتی ہے۔ کا غذات اور فائل واپس کی جاتی ہے ۔
حضرت مفتی صاحب سے درخواست ہے کہ قرآن و حدیث کی روشنی میں ہماری رہبری فرما کر شکریہ کا موقع عنایت فرمائیں۔
جواب
شریعت میں یہ اصول ہے کہ آدمی جتنا کام کرتا ہے اتنی ہی اجرت کا مستحق ہوتا ہے۔ لہذا صورت مسئولہ میں اگر آپ کے والد صاحب نے مقدمات کی فیس یک مشت نہیں لی تھی، بلکہ جیسے جیسے کیس آگے بڑھتے تھے اس حساب سے فیس وصول کرتے تھے تو وہ فیس آپ کو واپس کرنے کی ضرورت نہیں ۔ البتہ اگر کسی سے فیس لی تھی لیکن جس مرحلے کے لیے فیس لی وہ کام مکمل نہیں کیا تو اس فیس کے آپ کے والد مستحق نہیں یا تو ان کو وہی فیس واپس کر دیں یا پھر مالکان کی اجازت سے ان کے لیے اپنے والد کی جگہ کوئی دوسرا وکیل منتخب کریں ۔اور جن فائلوں پر فیس کوڈورڈ سے لکھی ہوئی ہو تو اصل مالکان سے دریافت کریں اور اگر ان کی بات پر یقین نہ ہو تو ان سے گواہ بھی طلب کر سکتے ہیں ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں