مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
جلاٹین پر مشتمل ادویات کا استعمال
سوال
بیرونی ممالک میں بعض ادویات میں “جلاٹین” (Gelatin)نامی ایک مرکب استعمال ہوتا ہے۔ اس کے بارے میں مجھے مکمل معلومات تو نہیں، تاہم انٹرنیٹ پر دستیاب معلومات کے مطابق یہ عموماً جانوروں کی ہڈیوں کی جھلی سے بنتا ہے، جنہیں پگھلا کر تیار کیا جاتا ہے۔
میرا سوال یہ ہے کہ ایسی ادویات کا استعمال، خصوصاً وہ کیپسول جن کا بیرونی خول جلاٹین سے بنایا جاتا ہے، کس حد تک جائز ہے؟ خاص طور پر اگر یہ جلاٹین حلال جانوروں (جیسے گائے یا بکری) سے حاصل کیا گیا ہو، لیکن وہ جانور شرعی طریقے سے ذبح نہ کیے گئے ہوں، تو کیا اس صورت میں ان ادویات کا استعمال جائز ہوگا؟ البتہ اگر جلاٹین حرام جانور (مثلاً خنزیر) سے حاصل کیا گیا ہو تو اس کے عدمِ جواز میں کوئی شک نہیں۔ مزید یہ کہ اگر تھوڑی مقدار میں یہ مرکب ادویات میں شامل ہو، تو کیا اس کی گنجائش ہوگی، بشرطیکہ اس میں کسی صریح نافرمانیِ الٰہی کا پہلو نہ ہو؟
براہِ کرم اس مسئلے کے بارے میں اپنی قیمتی رائے سے آگاہ فرمائیں۔ نیز اگر اس موضوع پر مفتی محمد تقی عثمانی صاحب یا دیگر اہلِ علم کی کوئی مستند تحقیق یا فتویٰ موجود ہو تو اس سے بھی مطلع فرما دیں۔ اگر آپ یا دیگر اہلِ علم کی آراء میں اختلاف ہو تو اس کی وضاحت بھی فرما دیں۔
آخر میں یہ وضاحت بھی کر دوں کہ جلاٹین صرف ہڈیوں ہی سے نہیں، بلکہ جانوروں کی کھال اور دیگر بافتوں سے بھی تیار کیا جاتا ہے۔
جواب
واضح رہے کہ جلاٹین پروٹین سے بنا ہوا ایک شفاف مادہ ہے جو جانور کی کھال، ہڈی ،اتصالی ریشے اور نباتات سے تیار کیا جاتاہے جس کا بنیادی کام ادویات اور غذائی اشیاء میں گاڑھاپن اور جماؤ پیدا کرنا ہے۔ جلاٹین اور اس پر مشتمل اشیاء کی حلت وحرمت کا مدار اس کے ماخذ پر ہے۔
نمبر۱۔لہذا جو جلاٹین حلال اورمذبوحہ (شرعی طریقہ سے ذبح کیے ہوئے)جانور کی کھال، ہڈیوں یا نباتات سے تیار کیا گیا ہووہ حلال ہے اور اس کا ہر طرح استعمال جائز ہے۔
نمبر۲۔ حرام اور غیر مذبوحہ جانور کی کھال سے بنایا گیا جلاٹین کیمیائی عمل میں دباغت اور ناپاک رطوبات کے زائل ہونے کی وجہ سے صرف پاک ہوگا، حلال نہیں؛ یعنی اس کا صرف بیرونی استعمال جائز ہے، کھانا جائز نہیں۔ البتہ صرف علاج و معالجہ کی صورت میں، مسلمان ماہر اطباء کی رائے کے مطابق اگر کوئی اور متبادل دستیاب نہ ہو تو اس کے استعمال کی گنجائش ہے۔
نمبر۳۔ غیر مذبوحہ جانور کی صرف ہڈیوں سے بنایا گیا جلاٹین پاک اور حلال ہے، کیونکہ ان کے اوپر سے ناپاک رطوبات زائل ہو جاتی ہیں اور ان میں حیات بھی نہیں ہوتی۔ اور حرام جانور کی ہڈیوں سے بنایا گیا جلاٹین کیمیائی عمل کی وجہ سے پاک تو ہو جاتا ہوگا، لیکن جانور کے حرام ہونے کی وجہ سے اس کا کھانا جائز نہیں؛ لہٰذا اس کا صرف بیرونی استعمال جائز ہے، داخلی استعمال جائز نہیں۔ البتہ صرف علاج و معالجہ کی صورت میں، اگر کوئی اور متبادل نہ ہو تو اس کے استعمال کی گنجائش ہے۔
نمبر۴۔ خنزیر سے بنایا گیا جلاٹین کا استعمال مطلقا ناجائز اور حرام ہے۔ خنزیر تمام اجزاء سمیت نجس العین ہے تبدیلی ماہیت کے بغیر اس کے کسی بھی جزو سے کسی بھی شکل میں عام حالات میں انتفاع جائز نہیں۔
مذکورہ تفصیل الفقہ الاسلامی جدہ، جمہور علماء اور حضرت مفتی تقی عثمانی صاحب کی تحقیق کے مطابق ہے، اور ہمارے دارالافتاء کی بھی یہی رائے ہے۔ البتہ بعض حضرات، جیسے الفقہ الاسلامی ہند، کے نزدیک جلاٹین بناتے وقت کیمیائی عمل کے باعث اس کی ماہیت تبدیل ہو جاتی ہے، اس لیے جلاٹین اور اس پر مشتمل ادویات کا ہر طرح استعمال جائز ہے۔ (مستفاد: فتاوی عثمانی و فقہ البیوع: مفتی محمد تقی عثمانی، فقہ الحلال: زیر نگرانی مفتی محمد نجیب خان ، جلاٹین تعارف اور اس کا شرعی حکم:مفتی عقیل منیر، حلال وحرام: مفتی سید عابد شاہ، حلال غذا جدید طب اور سائنس: مولانا سر فراز محمد)۔ تاہم آپ کو جس پر اعتماد اور اطمینان ہو آپ اس پر عمل کر سکتے ہیں۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں