مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
بیوہ ، مرحوم کے چچا زاد کے درمیان تقسیم میراث/جس مسجد میں نمازِ جمعہ نہ ہوتا ہو وہاں عیدین کی نماز ادا کرنا
سوال
اگر کوئی عورت خود بھی صاحب نصاب ہو اور اس کا شوہر بھی مالدار صاحب نصاب ہو اور اس کے شوہر کے انتقال کے بعد اس کے مال میں سے ربع مال تو اس کی بیوی کو ملے گا باقی مال کس کو ملے گا کیونکہ دونوں کے اصول و فروع نہیں ہیں نہ شوہر کے بہن بھائی ہیں ۔
وضاحت:سائل سے زبانی استفسار سے معلوم ہوا کہ مرحوم کے والد کے چچا کی مذکر مؤنث دونوں قسم کی اولاد موجود ہیں ۔
دوسرا مسئلہ یہ کہ جمعہ کے لئے کیا شرائط ہیں اور امام شافعی ؒ کے قول پر عمل کر سکتے ہیں یا نہیں ؟ اور جہاں جمعہ نہ ادا ہوتا ہو وہاں عیدین ادا کر نے کا کیا حکم ہے ؟ آیا اس طرح کرنا درست ہے یا نہیں؟
جواب
پہلا مسئلہ: مذکورہ صورت میں مرحوم شوہر کے ترکے میں سے بیوی کو ربع ملنے کے بعد بقیہ مال مرحوم کے والد کی چچا زاد اولاد کو بطورِ عصبہ کے ملے گا۔
دوسرا مسئلہ: اصلاً گاؤں میں جمعہ صحیح نہیں اور شہر و قصبات میں صحیح ہے اور قصبہ کی تعریف ہمارے عرف میں یہ ہے کہ جہاں چار ہزار سے زائدیا اس کے قریب آبادی ہو اور ایسا بازار ہوجس میں چالیس پچاس متصل دکانیں ہوں اور بازار روز لگتا بھی ہو نیز اس بازار میں روز مرہ کی ضروریات بھی ملتی ہوں مثلا : جوتوں کپڑوں کی بھی دکان ہو اور دودھ گھی کی بھی دکانیں ہوں ،معمار ،ڈاکٹر یا حکیم بھی ہواس کے علاوہ ڈاکخانہ ،پولیس کا تھانہ یا چوکی بھی ہو اور اس میں مختلف ناموں سے موسوم محلے بھی ہوں ۔
اسی طرح وہ مضافاتی دیہات اور گاؤں جو شہری حدود کے ساتھ اس طرح متصل ہوں کہ ان دونوں کے درمیان کوئی زمین کا خالی قطعہ (غیر تعمیر شدہ حصہ)کھیتیاں، چراگاہیں یا صحرا حائل نہ ہو ،بلکہ مسلسل یا قریب قریب آبادی ،گھر یا سبزہ زار ہوں اور وہاں کے عرف میں اسے شہر کے تابع سمجھا جاتا ہو ،وہاں الگ سے بازار ہو یا وہاں کے باشندے اپنی ضروریاتِ زندگی اسی شہر کے بازار سے پوری کرتے ہوں تو ایسے علاقے بھی شہر کے حکم میں ہوں گے اور وہاں جمعہ جائز ہوگا ۔تاہم اگر ایسا نہ ہو ( یعنی متصل اور تابع نہ ہوں ) تو جمعہ کا قیام درست نہ ہوگا ۔اور جو شرائط جمعہ کی ہیں وہی عیدین کی بھی ہیں ۔
اس وضاحتی تمہید اور اصولی جواب کے بعد بہتر یہ ہے کہ اس سلسلے میں آپ اپنے مقام کے مستند علماء کرام کو جمع کر کے مشورہ کریں اور ان حضرات کے سامنے یہ سوال و جواب بھی پیش کریں پھر وہ حضرات اس جگہ کا مشاہدہ کر کے اس کے متعلق جو فیصلہ کریں اس پر سب کو عمل کرنا چاہیے۔ واضح رہے کہ عمومی حالات میں امام شافعیؒ کے قول پر عمل کرنا درست نہیں ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
