مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
آن لائن ڈیجیٹل اشتہارات دیکھنےپر پیسے کمانے كا حكم
سوال
ایک اہم اور ضروری مسئلہ معلوم کرنا ہے۔آن لائن اشتہارات(Advertise)دیکھ کر پیسہ کمانے سے متعلق ہے۔ مجھے ایک کمپنی نے 10000(دس ہزار)جمع کرنے کو کہا۔۔۔میں نے جمع کرادیا۔۔۔کمپنی والوں نے کہا کہ ہم آپ کو روز 100 اشتہارات دیں گے اور ہر اشتہار کے بدلے آپ کو پیسے ملیں گے۔۔۔تو یہ اشتہار دیکھ کر پیسے کمانا کیسا ہے۔۔۔اگر جائز مصنوعات کے اشتہار ہوں تو كيا پیسے کمانا جائز ہے؟اور اگر ناجائز مصنوعات کے اشتہارات ہوں تو پیسے کمانا حرام ہے؟
جواب
واضح رہے کہ فحش اور ننگی تصاویر یا میوزک وغیرہ جیسے شرعی منکرات وفواحش پر مشتمل مواد یا ناجائز کاروباری کمپنیوں(مثلاً فلموں،سودی بینکوں،انشورنس اور شراب وغیرہ)کے اشتہارات کے ذریعے پیسہ کمانا ہرگز جائز نہیں ہے۔
البتہ اگر اشتہارات جائز ہوں(یعنی ننگی تصاویر یا کسی فحش مواد پر مشتمل نہ ہوں،حلال اور جائز کاروبار کرنے والی کمپنیوں، اداروں کے اشتہار ہوں)تو درجہ ذیل شرائط کے ساتھ اشتہارات وزٹ کرکے یا اس پر کلک(Click) کرکے پیسے کمانے کی شرعاً اجازت ہوسکتی ہے
الف :فریقین کے درمیان پہلے سے اجرت اس طرح طے شدہ ، معلوم اور متعین ہو جو بعد میں باعث نزاع نہ بنے۔
ب: پبلشرز (وہ مالکان جو اپنی ویب سائٹ، چینل، پیچ وغیرہ پر دوسرے لوگوں کےاشتہارات کی تشہیر کرنا چاہتے ہوں) اور گوگل کے ساتھ کئے گئے معاہدے کی پابندی ہو ( یعنی پبلشر اپنے متعلقین یا کسی ادارے کے ذریعے اشتہارات پر کلک نہ کروائے ، وغیرہ)۔
ج: کسی قسم کا دھوکہ دہی کا عنصر نہ پایا جائے
و: پبلشر کی خود اپنی ویب سائٹ اور کام جائز درجہ میں ہو۔
لیکن ہماری معلومات کے مطابق اشتہارات پر کلک کا کام کرنے والوں کے لئے اشتہارات پر خود کلک کرنا یا اس مقصد کے لئے اجرت پر لوگوں سے کلک کرنے کا کام لینا، گوگل اور پبلشر کے درمیان طے شدہ معاہدہ اور ضوابط کی خلاف وزی کرنے اور اشتہار دینے والی کمپنی ،ادارہ ایڈوٹائزر کو دھوکہ دینے کی وجہ سے شرعًانا جائز ہے اور اس طریقہ سے جو آمدنی حاصل ہو گی وہ بھی ناجائز آمدن ہو گی ؛کیونکہ اس کام سے حاصل ہونے والی رقم وہ عام لوگوں کے اس اشتہار تک جھوٹی رسائی ظاہر کرنے کا معاوضہ ہے، حالانکہ معاہدہ میں یہ بات طے ہوتی ہے کہ پبلشر خود ان اشتہارات پر کلک نہیں کرے گا اور کسی دوسرے کو بھی صراحۃ یا اشارۃً کلک کرنے کا حکم نہیں دے گا، لہذا اس معاہدہ کے بعد ان اشتہارات پر کلک کرنے کے لئے گروپ بنانا اور ایک دوسرے کے اشتہارات پر کلک کرنے کا کہنا یا اس کام کے لئے لوگوں کو ہائر کرنا اور کسی کا ایسے عمل کے لئے ملازمت کرنا، (خواہ وہ اشتہارات جائز درجہ ہی میں کیوں نہ ہوں ) کمپنی سے طے شدہ معاہدہ کی سراسر خلاف ورزی اور ایڈور ٹائزر کمپنی کے ساتھ دھو کہ ہے، کیونکہ ان کا مقصد حقیقی معنی میں زیادہ سے زیادہ عوام کو اپنی مصنوعات کی آگاہی دینا ہے۔
اس لئے صورت مسئولہ میں ایسی ملازمت چھوڑنا لازم ہے اور اس سے جو آمدن ہوئی ہو اس کوواپس لوٹا دیں، اگر واپسی مشکل ہو تو صدقہ کر دیں۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں