مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
زندگی میں وراثت کو تقسیم کرنا یا کچھ حصہ ہبہ کر دینا
سوال
ایک پلاٹ جس کی مالیت تقریباً اڑھائی کروڑ ہے، یہ پلاٹ ایک خاتون کی ملکیت ہے جو بہت ضعیف ہے، اس کے والدین اور بھائی اور شوہر فوت ہو چکے ہیں ان کی کوئی اولاد نہیں ہے ایک بہن حیات ہیں اور بھائی جو ان سے پہلے فوت ہو گئے، ان کی اولاد موجود ہے جن کی تعداد سات ہے چار بیٹیاں اور تین بیٹے، اس تفصیل کے مطابق مندرجہ ذیل سوالات کا جواب دیں ۔
نمبر(1)اس خاتون کے دنیا سے رخصت ہونے کے بعد اس کی میراث شریعت کے مطابق کس طرح تقسیم ہوگی۔
نمبر(2)اگر وہ خاتون اپنی زندگی میں اپنے کسی رشتہ دار کو اپنی جائیداد یا اس کا کچھ حصہ گفٹ کرنا چاہے تو ان کا یہ عمل شریعت کے خلاف تو نہیں۔
تنقیح :کیا خاتون مرض الوفات میں مبتلا ہیں ؟
جوابِ تنقیح :خاتون کی عمر اس وقت ستر سال ہے اور بالکل صحت مند ہے ۔
جواب
زندگی میں وراثت کی تقسیم
نمبر(1)زندہ شخص سے جائیداد کی تقسیم کا تقاضا وراثت کے طور پر کرنا جائز نہیں ہے، وراثت کا تعلق اس بقیہ ترکہ سے ہوتا ہے جو انسان اپنی وفات کے وقت اپنی ملکیت میں چھوڑتا ہے تین حقوق (تجہیز و تکفین کے متوسط اخراجات، قرض کی ادائیگی اور جائز وصیت) ادا کیے جانے کے بعد، لہٰذا خاتون کے انتقال کے وقت جو ورثاء زندہ ہونگے وہی شریعت کے مطابق اس کے وارث کہلائیں گے، ابھی سے ان کی تعیین درست نہیں۔
نمبر(2)اگر صاحبِ جائیدادخاتون ایسے مرض میں مبتلاء نہ ہوں جس میں صحت یابی کی امید بالکلیہ ختم ہو گئی ہو تو وہ زندگی میں اپنی جائیدادیا اس کا کچھ حصہ دلی خوشی و رضامندی سے کسی کو ہبہ (گفٹ) کرنا چاہیں تو کر سکتی ہیں ، بشرطیکہ کسی وارث کو محروم کرنے کی نیت نہ ہو نیز خاتون کو چاہیے کہ اپنی بقیہ زندگی کے لیے اپنی جائیداد کا کچھ حصہ روک کر رکھ لیں تاکہ بعد میں کسی کا محتاج نہ ہونا پڑے۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
