مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
عورت كا اپنے زيورات شوہركی اجازت كےبغیر صدقہ یا ہبہ کرنے کا حکم ؟/عورت کو رخصتی سے پہلے سسرال کی طرف سے ملنے والے زیورات کاحکم ؟/کیا شوہر ایک بیوی کو اپنی دوسری بیوی کی خدمت پر مجبور کر سکتا ہے ؟/شوہر کے ظلم کرنے کی صورت میں بیوی خلع کا مطالبہ کر سکتی ہے یا نہیں ؟/دوسری شادی کے لیے پہلی بیوی کی رضامندی ضروری ہے؟
سوال
ایک عورت اپنے زیورات شوہر کی اجازت کے بغیر کسی کو بطور صدقہ یا ہدیہ دے سکتی ہے یا نہیں؟اسی طرح اگر وہ بیچنا چاہے تو کیا حکم ہے ؟
نمبر۲۔ایک عورت کی منگنی ہوئی، رخصتی سے پہلے سسرال کی جانب سے اس کو کچھ زیورات ملے ،تو کیا وہ سسرال کی اجازت کے بغیر ان کو آگےصدقہ کر سکتی ہے یا نہیں؟اور کیا بطور ہدیہ کسی کو دے سکتی ہے یا نہیں ؟
نمبر۳۔کسی بندے نے دو شادیاں کی اس صورت میں اگر ایک بیوی بیمار پڑھ جاتی ہے تو کیا شوہر دوسری بیوی کو اس کی خدمت پر مجبور کر سکتا ہے یا نہیں ؟یا ویسے عام حالات میں بھی ایک سوکن پر دوسری کی خدمت لازمی ہوتی ہے یا وہ اس سے آزاد ہے۔
نمبر۴۔اگر کوئی بندہ اپنی بیوی پر ظلم کرتا ہے نہ اس کے حقوق ادا کرتا ہے نہ طلاق دیتا ہے ،تو کیا اس عورت کے رشتہ دار، بھائی والد ،وغیرہ اس سے زبردستی طلاق دلواسکتے ہیں؟اور اگر وہ طلاق نہ دے تو کوئی ایسا عمل (تعویذات یا کوئی اور حیلہ وغیرہ)اختیار کیا جا سکتا ہے کہ وہ عورت اس سے آزاد ہو جائے ،اگر وہ اس کے ساتھ نہ رہنا چاہے تو؟
نمبر۵۔کیا دوسری شادی کے لئے پہلی بیوی کی رضامندی ضروری ہے؟نیزایک آدمی نے دو شادیاں کی ،اب ایک بیوی کو اپنے ساتھ رکھتا ہے،(یعنی وہ بندہ مسافر ہے گھر سے دور جہاں رہتا ہے وہاں اس نے دوسری شادی بھی کی ہے اب وہ بیوی اس کے ساتھ وہاں رہتی ہے )جبکہ دوسری بیوی جہاں اس کا اپنا وطن ہے وہاں رہتی ہے،لیکن اس مرد نے اس بیوی کو اس بات پرراضی کیا ہوا ہے کہ ہر مہینہ میں تین دن (یعنی شب وروز )اس کے پاس گذارے گا، کیا ایسا کرنا جائز ہے ؟اگر نہیں تو کیا کیا جائے؟
جواب
نمبر(۱۔۲)عورت کو اپنے ذاتی مال میں تصرف کا اختیار ہے، البتہ شوہر اور سسرال والوں کی طرف سے جو زیور بطور ہدیہ کے ملتے ہیں، اسی طرح جوما ل اس عورت کی ذاتی ملکیت میں ہے ان کو اور زیورات کو آگےہدیہ یا صدقہ کرنے کے لیےبہتر یہ ہے کہ بیوی شوہر سے اجازت لے کر ان زیورات کو ہدیہ یا صدقہ کرے ،تاکہ یہ گھر میں فتنہ اور فساد اور ناراضگی کا سبب نہ بنے۔
نمبر۳۔واضح رہے کہ بیوی پر اپنی سوکن کی خدمت شرعاً لازم نہیں ہے ،البتہ اخلاقی طور پر اس خدمت کو انجام دینا باعث ثواب اورحسن معاشرت کا اظہار ہے۔
نمبر۴۔اگر واقعتاً کوئی بندہ اپنی بیوی پر ظلم کرتا ہے اور اس کے حقوق ،مثلاًنان ونفقہ وغیرہ ادانہیں کرتا ہے ، ،تو سب سے پہلے وہ شوہر کو مال کے عوض طلاق یا مہر چھوڑنےکے بدلےخلع پر آمادہ کرے،اگر اس پر آمادہ نہیں ہوتا توعدالت میں تنسیخ نکاح کےشرعی اسباب کی بنیاد پر مقدمہ دائر کرنا چاہیےاور عدالت کی طرف سےفسخ نکاح کی ڈگری طلاق کے حکم میں ہو گی،اس کا تفصیلی درست طریقہ دارالافتاء سے رجوع کر کے سمجھا جا سکتا ہے) تاہم اس کے لیے کوئی غیر شرعی طریقہ اختیار کرنے سے بچنا چاہیے(مثلاًتعویذ گنڈے کرنا ،جادو وغیرہ ) (ماخذہ حیلہ ناجزہ:ص،72،ط :دارالاشاعت۔
نمبر۵۔دوسری شادی کے لئے پہلی بیوی سےاجازت لینا شرعاً ضروری نہیں ہے ،تاہم بیویوں کے درمیان نان ونفقہ،رہائش اور ادائیگی حقوق میں برابری ضروری ہے ،ہاں اگر بیوی رہائش سے متعلق اپنے حقوق معاف کردے یا اس میں کمی کردے تو اس کو اس کا اختیار ہے وہ کر سکتی ہےاور اگر وہ اپنے حقوق کادوبارہ مطالبہ کرے تو کر سکتی ہے ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
