سوال پر غور کیا گیا ہے اور سوال کے ساتھ شوہر کی طرف سے ارسال کیا گیا آڈیو میسج بھی سنا گیا۔ شوہر نے اپنے میسج میں گو کہ یہ الفاظ استعمال کیے ہیں کہ یہ میری طرف سے فارغ ہے، لیکن اس کے فوراً بعد وہ کہہ رہا ہے کہ میں کاغذ دینے کیلیے تیار ہوں۔ اب آپ مجھے بتائیں کہ میں فون پر طلاق دوں یا منہ سے بول کردوں۔ اس کے بعد بھی وہ اپنے میسج میں کہہ رہا ہے کہ میں اس کو طلاق دوں گا۔ نیز وہ ان الفاظ سے طلاق کی نیت کا انکار بھی کررہا ہے لہذا اس پورے پسِ منظر کو سامنے رکھتے ہوئے معلوم ہوتا ہے کہ وہ فارغ ہے کہ الفاظ سے طلاق واقع نہیں کررہا بلکہ حالات سے تنگ آکر طلاق دینے کے لیے تیار ہے۔ جیسے کہ میسج کے اگلے حصے میں اس نے اس بات کی وضاحت کی ہے، نیز یہ بات بھی واضح رہے کہ فارغ کے الفاظ طلاق کے معاملے میں الفاظ کنایہ ہیں، جو طلاق واقع ہونے میں نیت کے محتاج ہیں۔