مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
زندگی میں تقسیم ِجائیداد اور وراثت کا مسئلہ
سوال
ہمارے والد صاحب نے اپنی زندگی میں اپنی بیٹیوں کو مکان وپلاٹ خرید کر دیئے ہیں تو کیا والد صاحب کے انتقال کے بعد وہ ترکہ میں شمار کیا جائیگایا نہیں ؟
والد صاحب کے انتقال کے بعد بیٹوں نے ساری جائیداد اپنے درمیان تقسیم کر لی اور بہنوں کو محروم رکھا تو کیا ان کا اس طرح کرنا ٹھیک ہے ؟
جواب
زندگی میں اپنی اولاد کو مکان یا پلاٹ وغیرہ دینا شریعت کی روشنی میں تقسیمِ میراث نہیں ہے(کیونکہ میراث تو انتقال کے بعد تقسیم ہوتی ہے )بلکہ یہ ہبہ (گفٹ) ہے ، جس کے بارے میں اگرچہ اصل حکم تو یہ ہے کہ بیٹوں اور بیٹیوں کے درمیان برابری کی جائےاور کسی وارث کو نقصان پہچانے کی غرض سے محروم نہ کیاجائے لیکن اگر نقصان پہنچانا مقصود نہ ہوبلکہ کسی معقول شرعی وجہ کی بناء پر اپنی اولاد میں فرق کیا جائے تو ایسا کرنا جائز ہے البتہ یہ ضروری ہے کہ جس کو جو مکان یا پلاٹ دے اس سے اپنا اختیار مکمل طورپرختم کرکے وہ اسے مالک وقابض بناکرکے دے،صرف زبانی یاکاغذی کارروائی کافی نہیں ورنہ ہبہ مکمل نہیں ہوگا، لہٰذا صورتِ مسئولہ میں مرحوم نے اپنی چاروں بیٹیوں کو جو مکان اور پلاٹ خرید کردئیے ہیں وہ اگر ہر بیٹی کو اس کا حصہ الگ الگ کرکے مالک وقابض بناکر دیدیا تھا اور اس سے اپنااختیار بالکلیہ ختم کردیا تھا تو ایسی صورت میں جس بیٹی کو جو حصہ دیا وہ اس کی مالک ہے ، اسے ترکہ میں شامل نہیں کریں گے۔
والدِ مرحوم کے انتقال کے بعد بیٹوں کا ساری جائیداد اپنے درمیان تقسیم کر نا اور اپنی بہنوں کو محروم رکھنا ناجائز اور ظلم ہے، بیٹوں پر لازم ہے کہ وہ مرحوم کے ترکہ میں اپنی بہنوں کو بھی شریعت کے مقرر کردہ حصوں کے بقدر شریک کریں ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
