ب۔جن ناموں کے آخرمیں لفظ ’’اللہ ‘‘آتاہے، وہ اس شرط کے ساتھ جائز ہیں کہ ان کے معنیٰ درست ہوں، ان میں شرکیہ یا کوئی اورغلط معنیٰ نہ پائے جاتے ہوں، اگرکسی نام میں درست اورغلط دونوں قسم کے معانی کا احتمال ہوتو ایسے نام سے بچنا اور اگررکھ لیاگیاہوتوتبدیل کرنا بہتر ہے۔ لہٰذا’’سبحان اللہ‘‘ اور’’محسن اللہ‘‘ نام نہیں رکھنے چاہئے اور انہیں تبدیل کرلینابہترہے؛ کیونکہ ’’سبحان اللہ‘‘کے الفاظ اللہ تعالیٰ کی پاکی اور تقدیس بیان کرنے کے لئے استعمال ہوتے ہیں ، اگرچہ ان میں یہ تاویل کی جاسکتی ہے کہ مذکورہ نام والے شخص کی تخلیق بھی اللہ تعالیٰ کے کمالات اور عیوب سے پاک ہونے کا ایک نمونہ ہے۔ اور’’محسن اللہ ‘‘ کا ظاہری اور متبادر معنیٰ’’اللہ تعالیٰ کو اچھابنانے والا یا اللہ تعالیٰ کے ساتھ احسان کرنے والا‘‘ہے جوشرعی اعتبار سے درست نہیں ہے، البتہ اس میں درست معانی کا احتمال بھی موجود ہے کہ مثلاً: اسے اضافتِ لامیہ ماناجائےجس کا تقدیرِکلام یہ ہوگا’’محسن للہ ‘‘، اس کامعنیٰ یہ ہے کہ اللہ کی رضااور خوشنودی کے لئے نیکی کرنے والا‘‘تقدیری کلام یوں ہو گا’’محسن باللہ‘‘جس کے معنیٰ ہوں گے ’’اللہ تعالیٰ کی مدد سے نیکی کرنے والا‘‘۔