مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
یکطرفہ خلع ، میری طرف سے فارغ ہے کا حکم
سوال
ایک مسئلہ درپیش ہے،مسئلہ یہ ہے کہ میاں بیوی کے درمیان کسی ناچاقی کی وجہ سے عورت نے عدالت سے خلع لیا ہے جس کا کوئی نوٹس ابھی تک موصول نہیں ہوا،یہ خلع لڑکے کی رضامندی سے نہیں ہوا،اس پر نا تو لڑکے کا کوئی بیان ہے اور نہ ہی دستخط ہے۔لڑکا ملک سے باہر رہتا ہے اس نے صرف اتنا کہا ہے کہ اگر میری باتیں مانا کرے گی تو میرے گھر میں رہے ،ورنہ میری طرف سے فارغ ہے۔مدلل جواب سے واضح فرما دیں کہ طلاق یا فسخ نکاح میں سے کچھ واقع ہوا ہے یا نہیں،اور اب دونوں میاں بیوی کودوبارہ ساتھ رہنے کے لئے کیا کرنا پڑے گا جواب جلدی مرحمت فرمادیں۔
جواب
واضح رہے کہ خلع کے لئے شوہر کی رضامندی شرط ہے۔اگر و اقعۃً مذکورہ عورت نےشوہر کے علم میں لائے بغیر عدالت سے یکطرفہ خلع کی ڈگری حاصل کی ہے اور شوہر کو واقعی اس کے بارے میں کچھ علم نہ تھا تو شرعاً خلع کی مذکورہ ڈگری معتبر نہیں ہے۔اس سے کوئی طلاق واقع نہیں ہوگی ،فریقین کا نکاح بدستور قائم ہے۔نیز شوہر کو جو باتیں اپنی بیوی سے منوانا مطلوب تھیں اگر ان باتوں پر عورت نے عمل کیا ہے تو ٹھیک،ورنہ شوہر کا قول:میری طرف سے فارغ ہے؛ اس سے شوہر کی طلاق کی نیت ہو تو ایک طلاق بائن واقع ہوجائےگی۔اس صورت میں عدت کے اندر یا عدت کے بعد دونوں باہمی رضامندی سے گواہوں کی موجودگی میں نئے مہر کے عوض نیا نکاح کرکے اکٹھے رہ سکتے ہیں۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
