اگر گذشتہ سالوں کی زکوٰۃ ادا نہیں کی گئی تو سائل پر گذشتہ سالوں کی زکوٰۃ کی ادائیگی لازم ہے جس کا طریقہ یہ ہوگا کہ پہلے سال جب آپ پر زکوٰۃ فرض ہوئی اس وقت جتنا سونا آپ کے پاس موجود تھا اس کا چالیسواں حصہ واجب الاداء ہوگا ۔ دوسرے سال جتنا سونا موجود تھا اس میں سے پہلے سال کی واجب الاداء زکوٰۃ یعنی چالیسواں حصہ نکال کر ما بقی سے چالیسواں حصہ واجب الاداء ہوگا اسی طرح ہر سال کا حساب کرتے وقت پچھلے سال کی واجب الاداء زکوٰۃ منہا کرتے جائیں آخر میں سب کو جمع کرکے زکوٰۃ ادا کر دیں اور ہر سال کے وقت وجوب کی قیمت کے حساب سے بھی زکوٰۃ ادا کرنے کی گنجائش ہے تاہم موجودہ قیمت کے لحاظ سے ادائیگی میں احتیاط زیادہ ہے۔