مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
کاشتکار کو کھاد فراہم کرکے تمام گنا شوگر مل کو فروخت کرنے کا پابند بنانا، متبادل جائز صورت
سوال
کاشتکار حضرات کو شوگر ملز والے کھاد، دوائی وغیرہ ادھار پر قرض دیتے ہیں ، جس کا ریٹ بھی متعین کر لیتے ہیں، رقم لیٹ کرنے پر بھی کوئی اضافی رقم نہیں لیتے، لیکن وہ کاشتکار کو جو فارم دیتے ہیں اس میں تحریری طور پر پابند کرتے ہیں کہ کاشتکار ملز ہذا کو سارا گنا سپلائی کرے گا، جس پر کا شتکار کوئی اعتراض نہیں کرے گا، یاد رہے کہ ملز کے ملازم اپنے طور پر کہہ دیتے ہیں کہ کہ صرف قرض جتنا گنا ملز میں دیں باقی آپ کی مرضی اور باقی گنا نہ دینے کی صورت میں کوئی کارروائی بھی نہیں کرتے۔ اب پوچھنا یہ ہے کہ یہ قرض سود کے زمرے میں آتا ہے یا نہیں ؟ اور یہ قرض لینا جائز ہے یا نہیں۔
نوٹ: شوگر ملز والے بینک سے قرض لیتے ہیں سود پر پھر اسی پیسوں سے کھاد،دوائی وغیرہ لیتے ہیں کھاد، دوائی اپنے قبضہ میں لیکر پھر کاشتکاروں کو دیتے ہیں۔ تحریری جواب عنایت فرما کر مشکور فرمائیں
جواب
سوال میں ذکر کردہ تفصیل سے معلوم ہوتا ہے کہ شوگر مل والے کا شتکار کو کھاد اور ادویات اس شرط پر فروخت کرتے ہیں کہ کاشتکار گنا شوگر مل کو ہی فروخت کرے گا ۔ اس میں ایک عقد کو دوسرے عقد کے ساتھ مشروط کر دیا گیا ہے اس لیے اس طرح معاملہ کرنا شرعا درست نہیں ۔ اس سے اجتناب ضروری ہے ۔
اس کا متبادل یہ ہے کہ شوگر مل والے کاشتکار کے ساتھ بیع سلم کر لیں جس کا طریقہ یہ ہے کہ شوگر مل کو جس قدر گنے کی ضرورت ہے اس کی مقدار ، وصف طے کر لیں اور پھر اس کا ریٹ بھی متعین کر کے طے شدہ مکمل رقم کاشتکارکو اسی مجلس میں نقد دے دیں ۔نیز بیع سلم میں اس کی شرائط کا لحاظ ضروری ہے اور وہ مندرجہ ذیل ہیں :
نمبر1-فروخت کی جانے والی چیز کی جنس بیان کردی جائے کہ : گنا ہے ،گیہوں ہے یا جو۔
نمبر2- نوع بیان کردی جائے کہ “گنا” کس قسم کی زمین کا ہوگا۔
نمبر3- صفت بیان کردی جائے کہ عمدہ ہوگا یا گھٹیا۔
نمبر4-مقدار بیان کردی جائے کہ کتنا “گنا” لینا ہے۔
نمبر5- مدت معین کرلی جائے کہ کس وقت “گنا” حوالہ کرنا ہے ۔
نمبر6- جس قدر” گنا” لینا ہو اس کا باہمی طے شدہ متعین نرخ پہلے ہی یعنی بوقت عقد دے دیا جائے۔
نمبر7-” گنا” کس جگہ پر حوالہ کیا جائے گا اس کو بھی معین کر لیا جائے۔
مندرجہ بالا کسی ایک شرط کے بھی فوت ہونے کی صورت میں سلم کا معاملہ فاسد ہو جائے گا۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
