مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
کاروبار میں شریک بھائیوں کے مابین تقسیم
سوال
ایک شخص (جو اپنے بھائیوں میں سب سے بڑا ہے)نے اپنے معمولی سرمایہ سے سب سے پہلے کاروبار شروع کیا ،وقت گزرنے کے ساتھ اس کے چھوٹے بھائی اور اس کے بیٹے بڑے ہوتے رہے اور اس کے ساتھ کاروبار میں معاون بنتے رہے، اس طرح سے یہ کاروبار ایک شخص اور اس کے چھ بھائی اور چار بیٹے (کل گیارہ افراد) مل جل کرکرتے رہے ،اور وہ سب اکٹھے رہتے رہے ، اس نے سب بھائیوں کی پرورش کی یہاں تک کہ شادیاں اپنے بیٹوں کی طرح کی، وہی گھر کے سربراہ تھے ،بھائیوں کے ہرطرح کےا خراجات کی ذمہ داری اس پر تھی، باورچی خانہ بھی ایک تھا، اب کثرتِ عیال کی وجہ سے باورچی خانے دوکردئیے ہیں ،اس طرح سے سب مل جل کر رہتے رہے اور کاروبار بھی کرتے رہے ، سب سمجھتے تویہی تھے کہ یہ ہمارا مشترکہ کاروبار ہے لیکن کسی موقع پر ان کے درمیان شرکت کاکوئی معاہدہ نہیں ہوا،اس وقت ماشاء اللہ ان سب کی محنت سے کاروبار میں اللہ تعالیٰ نے بہت برکت عطافرمادی ہے، اب وہ اس کاروبار سے حاصل ہونے والی آمدن کوتقسیم کرنا چاہتے ہیں ،تو معلوم یہ کرنا ہے کہ اس تقسیم کاکیاطریقہ کار ہوگا، اور کیا ایک شخص کے بھائیوں کے ساتھ اس کے چار بیٹوں کوبھی برابرحصہ ملے گایانہیں ؟ جبکہ وہ بھی کاروبار میں شریک رہے۔
جواب
سوال میں جو صورتِ حال ذکرکی گئی ہے اگر وہ واقعہ کے مطابق ہے اور اصل کاروبار مذکورہ شخص نے اپنے ذاتی سرمایہ سے شروع کیاتھا، بیٹوں اوردوسرے بھائیوں نے نہ تو سرمایہ لگایااور نہ ہی ان کے ساتھ شرکت کا کوئی معاملہ طے ہوا تو ایسی صورت میں کاروبار اور اس سے حاصل ہونے والی آمدن کا مالک مذکورہ شخص ہے، اس کے بیٹے اور بھائی شرعاً اس کاروبار میں شریک نہیں ہیں بلکہ بیٹے صرف معاون اور متبرع ہیں ،وہ اپنی صوابدیدکے مطابق ان کو حصہ دے سکتے ہیں جبکہ بھائیوں کوملازم قرار دیا جائے گااوران کوان کی محنت کی وجہ سے اجرتِ مثل (یعنی ایسے کام کی عمومی طورپر جتنی مزدوری بنتی ہے )ملے گی اور اتنے عرصہ میں جتنامال وہ وصول کرچکے ہیں تخمینہ لگاکر اس کو اجرت میں سے منہاکردیاجائے۔
واضح رہے کہ مذکورہ حکم اس وقت ہے جب مذکورہ شخص نے اپنے ذاتی سرمایہ سے یہ کاروبار شروع کیا ہو ، اپنے والد مرحوم کے متروکہ مشترکہ وراثت سے نہ شروع کیاہو ،نیزاس کااپنے بھائیوں کے ساتھ شرکت کامعاملہ بھی طے نہ ہوا ہو لیکن اگر صورت ِ حال اس سے مختلف ہوتو اس کی تفصیل لکھ کر دوبارہ جواب معلوم کرلیں۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
