صورتِ مسئولہ میں اگر مرحوم نےمحض کا غذات اپنے بیٹے کے نام نہیں کروائے بلکہ اسے اس پلاٹ کا باقاعدہ مالک بنادیا تھا اور اپنی زندگی ہی میں یہ پلاٹ اپنے قبضہ وتصرف سے نکال کر اپنے بیٹے کے قبضہ میں مالکانہ طور پر دے دیا تھا تو وہ بیٹا اس کا مالک بن گیا تھا ، اس صورت میں دیگر ورثا اس میں حق دار نہیں ہوں گے، لیکن اگر مرحوم نے اپنے بیٹے کو مذکورہ پلاٹ کا مالک نہیں بنایا تھا بلکہ محض کسی مجبوری کے تحت انتقال اس کے نام کروایا تھا تو ایسی صورت میں وہ پلاٹ مرحوم کا ترکہ شمار ہوگا، اور مرحوم کے تمام شرعی ورثا اپنے اپنے حصوں کے بقدر اس میں حق دار ہوں گے، اور اگر مرحوم کے شرعی ورثا وہی ہیں جو سوال میں مذکور ہیں ان کے علاوہ کوئی اور نہیں ہے تو حقوقِ متقدمہ علی المیراث (تجہیز وتکفین، قرض ، وصیت ) کی ادائیگی کے بعد مرحوم کی بیوہ کو آٹھواں حصہ دے دیں ، اور بقیہ مال بیٹے اور بیٹی کے درمیان اس طرح تقسیم کردیں کہ بیٹے کو بیٹی سے دوگنا دیں ۔