ہر مالیت کے بیشمار انعامی بانڈز حکومت سرکاری بینکوں کے ذریعے لاکھوں لوگوں کو جاری کر کے اربوں روپے اکٹھے کرتی ہے۔ پھر ہر کچھ ہفتوں یا مہینوں کے بعد ہر مالیت کے انعامی بانڈز کی قرعہ اندازی منعقد کی جاتی ہے جو حکومت کی کڑی نگرانی میں ہوتی ہے ۔ اس میں یہ طریقہ ہوتا ہے کہ جس مالیت کے انعامی بانڈز کی قرعہ اندازی کرنی ہو تو پورے ملک میں جتنے بھی اس مالیت کے بانڈز جاری ہو چکے ہوں ان تمام کے نمبرز کا قرعہ نکالا جاتا ہے ۔ پهر اس قرعہ اندازی میں ملک بھر میں اس مالیت والے لاکھوں انعامی بانڈز میں سے چند کا نمبر قرعہ اندازی میں نکل آتا ہے۔ اور ان کو انعامی رقوم ادا کی جاتی ہیں ۔ انعامی رقم پر حکومت بھی دس فیصد ٹیکس وصول کرتی ہے ۔ انعام میں بھی فرق فرق ہوا کرتے ہیں کسی کو پانچ کروڑ بھی مل سکتا ہے کسی کو پچیس ہزار و غیره و غیره اور زیادہ تر بانڈز پر ایک روپیہ بھی انعام نہیں نکلتا۔ لیکن نقصان کسی کو بھی نہیں ہوتا کیونکہ اصل رقم تو سب کی محفوظ رہتی ہے ۔ انعامی بانڈز کی شرعی حیثیت پر انتہائی شدید اختلاف ہے کچھ لوگ ان کو سود اور جوا قرار دیتے ہیں جبکہ کچھ ان کو جائز قرار دیتے ہیں کہ ان میں نہ سود ثابت ہے نہ جوا ۔