مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
ورضاعۃ الکبیر عشرا” والی روایت کی تحقیق”
سوال
مفتیانِ کرام سے مندرجہ ذیل حدیث کی تحقیق اور اس سے متعلق سوالات کے جوابات مطلوب ہیں:
عن عائشة قالت: لقد نزلت آية الرجم ورضاعة الكبير عشرا، ولقد كان في صحيفة تحت سريري، فلما مات رسول الله صلى الله عليه وسلم اشتغلنا بموته، فدخل الداجن فأكلها
:ترجمہ
حضرت عائشہ رضی اللہ عنھا سے مروی ہے ،انہوں نے فرمایا :رجم کی آیت اور بڑی عمر کے لڑکے کو دس بار دودھ پلانے کے مسئلہ پر مشتمل آیت نازل ہوئی تھی ۔یہ دونوں آیتیں کاغذ پر لکھی ہوئی میرے بستر پر پڑی تھیں۔ جب رسول اللہ ﷺ کی وفات ہوئی تو ہم آپ ﷺ کے غسل و کفن وغیرہ میں مشغول ہو گئے ،ایک بکری آئی اور وہ کاغذ کھا گئی ۔
اب اس حدیث سے متعلق سوالات مندرجہ ذیل ہیں
نمبر۱۔کیا یہ حدیث ثابت ہے؟نمبر۲۔ اگر ثابت ہے تو اس سے قرآن کی حفاظت پر سوال اٹھتا ہے کہ قرآن کی آیات بکری کھا گئی اور وہ آیات اب قرآن میں نہیں ،لہذا جو قرآن ہم تک پہنچا وہ مکمل نہیں۔نمبر۳۔اس حدیث میں بڑی عمر کے لڑکے کو دودھ پلانے سے متعلق کہا گیا ہے تو کیا بڑی عمر کے لڑکے کو دودھ پلانے سے حرمت رضاعت ثابت ہو جائے گی ؟
جواب
نمبر۱۔مذکورہ حدیث سنن ابنِ ماجہ ،دار قطنی اور معرفۃ السنن والاٰ ثار وغیرہ کتبِ احادیث میں منقول ہے اور یہ حدیث ثابت ہے۔
نمبر۲۔اس حدیث کو لے کر یہ اعتراض کرنا کہ بکری نے قرآن کی آیات کھا لی جس کی وجہ سے قرآن ہم تک مکمل نہیں پہونچا ،درست نہیں؛کیونکہ قرآن کے نزول سے لے کر جمعِ قرآن تک اللہ تعالیٰ نے قرآن کو صرف کتابت کے ذریعے محفوظ نہیں کیا بلکہ اس کتاب کی خصوصیات میں سے ہے اللہ تعالیٰ نے اس کو ابتداءً صحابہ کرام کے محفوظ حافظوں میں محفوظ کیا اور صحابہ کی ایک بڑی جماعت آپ ﷺ کے وصال کے وقت حافظِ قرآن تھی ،نیز آپ ﷺ نے نزول کے ساتھ ساتھ ہی قرآن کی کتابت کا بھی اہتمام کیا کہ بعض صحابہ کرام کو آپ ﷺ باقاعدہ بلا کر نازل ہونے والی آیات ترتیب کے ساتھ لکھواتے اور خود اللہ تعالیٰ نے بھی ” { إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ”کہہ کر اس کی حفاظت کا وعدہ کیا ،لہذا اس حدیث کو لے کر یہ اعتراض کرنا کہ قرآن کی دو آیات بکری نے کھا لی تھیں بےمعنی ٰ ہے، کیونکہ قرآن صرف حضرت عائشہ رضی اللہ عنھا کے پاس محفوظ نہیں تھا اگر حضرت عائشہ رضی اللہ عنھا سے یہ آیات ضائع ہو بھی گئی تھی تو دیگر صحابہ کرام کے پاس وہ آیات بہر حال موجود تھیں ۔اسی طرح ناسخ و منسوخ قرآن کا خاصہ رہا ہے اللہ تعالی ٰ نے کچھ احکام نازل فرما کرایک وقت تک ان کو برقرار رکھا اور پھر انسانی مصلحت کی خاطر بعد میں یا تو ان آیات کو احکام سمیت منسوخ کر دیا یا صر ف آیات کو منسوخ فرما کر ان کے احکام کو باقی رکھا،اس حدیث میں جن آیات کا تذکرہ ہے ان کا تلاوت کے طور پر اس نسخہ میں شامل نہ ہونا اسی قبیل سے ہے،اس تمہید کے بعدسوال میں ذکر کردہ اشکالات کے جوابات مندرجہ ذیل ہیں
مذکورہ حدیث سے یہ معلوم ہوتا ہے کہ رضاعت کبیر والی آیت رجم والی آیت کے ساتھ ایک صحیفے پر لکھی ہوئی تھی اور رجم والی آیت قطعی طور پر منسوخ التلاوۃ ہے تو رضاعت کبیر والی آیت کا منسوخ التلاوۃ ہونا یقینی ہے،لہذا منسوخ التلاوۃ آیات کو لے کر قرآن کی جامعیت پر اعتراض کرنا قطعاً درست نہیں ، نیز یہ آیات حضرت عائشہ رضی اللہ عنھا کے پاس محفوظ تھیں اور دین کی نشر و اشاعت میں ان کا مقام و مر تبہ کسی پر پوشیدہ نہیں اور دین پر عمل کرنے اور کروانے کے جذبے میں ان کی ایک خاص شان تھی ،نیز آپ کے والد سب سے پہلے جامعِ قرآن بھی تھے ،ان سب فضائل و مناقب کے بعد آپ کے بارے میں یہ خیال کرنا کہ آپ نے ان آیات کو قرآن میں داخل کرنے سے تامل کیا اور ان آیات کو قرآن میں داخل نہیں کیا یہ خیال بغض و عناد پر مبنی ہے اور عقلاً اس کی کوئی حیثیت نہیں ۔
نمبر۳۔اس حدیث سے بڑے لڑکے کو جو دودھ پلانے سے حرمت ِ رضاعت کا ثبوت ہے اس کی تفصیل مندرجہ ذیل ہے
سوال میں مذکور حدیث مجمل ہے ، اس لیے کہ اس حدیث میں رضاعتِ کبیر سے متعلق آیتِ قرآن کا ذکر ہے اور وہ آیتِ قرآنی احکام ِ نسخ کے تحت منسوخ التلاوۃ والحکم ہے ،لہذا اس حدیث پاک سے تورضاعتِ کبیر پر استدلال درست نہیں ،البتہ مسلم شریف میں حضرت عائشہ رضی اللہ عنھا ہی سے اس طرح کی ایک تفصیلی حدیث منقول ہے ، جس میں یہ ذکر ہے کہ حضرت سہلۃ بنتِ سہیل رضی اللہ عنھا نے اپنے شوہرحضرت ابو حذیفہ رضی اللہ عنہ کے بڑی عمر کے غلام “حضرت سالم “کو حضورﷺ کے کہنے پر برتن میں نکال کر دودھ پلایا تھا اور آپ علیہ السلام نے ان دونوں کے درمیان رضاعت کو ثابت بھی کر دیا تھا ، اس حدیث سے بڑی عمر کے لڑکے کو دودھ پلانے سے رضاعت کا ثبوت سمجھ میں آتا ہے ؛لیکن صحیح بات یہ ہے کہ یہ اجازت حضرت سہلہ اور حضرت سالم رضی اللہ عنھما کے ساتھ خاص ہے،عمومی نہیں ۔جب کہ جمہور فقہاء و محدثین کا مذہب یہ ہے کہ رضاعتِ کبیر کی صورت میں حرمتِ رضاعت ثابت نہیں ہوتی اور ان حضرات کا مستدل قرآن کی وہ آیات اور احادیث ہیں جن میں حرمتِ رضاعت کو دو سال کے اندر ثابت مانا ہے ،قرآن میں اللہ تعالیٰ فرماتے ہیں ” {وَالْوَالِدَاتُ يُرْضِعْنَ أَوْلَادَهُنَّ حَوْلَيْنِ كَامِلَيْنِ } [البقرة: 233] کہ مائیں اپنی اولاد کو مکمل دو سال دودھ پلائیں ،اسی طرح حدیث میں آپﷺ نے فرمایا “لا رضاع الا ما کان فی الحولین”اور بھی اس مضمون کی احادیث و آثار ہیں جو حوالہ جات میں ذکر کیے جائیں گے ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
