مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
والد کا ناحق بددعادینا/والد کا بیٹے کی چیزیں فروخت کرنا /سوتیلی ماں اور اس کی اولاد کا نفقہ
سوال
ان مسائل سے پہلے بطورِ تمہید عرض ہے کہ ہمارا بچپن معاشی تنگدستی میں گزرا، والد صاحب گھر کے واحد کفیل تھے اس لیے معاشی حالات کافی خراب رہے ، جو نہی میں تھوڑا بڑا ہوا تو محنت کر کے ایک دکان کھولی اور حالات کافی بہتر ہوئے، والدہ محترمہ چونکہ وفات پاچکی تھیں اسی لیے والد صاحب کی ایک جوان خاتون سے شادی بھی کرائی اور اس خاتون سے ان کی اولاد بھی ہے، نیز والد صاحب، ان کی دوسری اہلیہ اور ان کی اولاد کا تمام خرچ میں برداشت کرتا ہوں، لیکن اس سب کے باوجود والد صاحب معمولی غلطی پر سخت سرزنش کرتے ہیں مثلا : کاروباری معاملات جن کا انہیں تجربہ نہیں ان میں بات کرنے سے منع کیا جائے تو وہ اس بات کو اپنی توہین سمجھتے ہیں اور سخت ناراض ہو کر بد دعائیں دیتے ہیں ، اسی طرح دکان سے بغیر اجازت اور بنا بتائے قیمتی اشیاء اٹھا کر فروخت کر دیتے ہیں اور ان کے پیش نظر یہ حدیث ہوتی ہے کہ آپ ﷺ نے فرمایا کہ : تم اور تمہارا مال تمہارے والد کے لیے ہے۔ ان تمام واقعات کے تناظر میں راہنمائی فرمائیں کہ کیا والد صاحب کی اس طرح ناحق بدعائیں قبول ہو کر ہمارے لیے وبال کا ذریعہ تو نہیں بنیں گی ؟ اسی طرح مذکورہ حدیث کو مد نظر رکھتے ہوئے والد صاحب کا بغیر اجازت اشیاء فروخت کرنا جائز ہے؟ نیز اس بابت بھی راہنمائی فرمائیں کہ والد صاحب کی دوسری اہلیہ اور اس کی اولاد کا خرچ ہم پر لازم ہے یا نہیں؟ اور اگر ہم نفقہ نہ دیں تو گناہگار ہوں گے ؟
جواب
قرآن و سنت کی روشنی میں والدین کی فرمانبرداری اور ان کے ساتھ حسن سلوک کی بہت تاکید کی گئی ہے۔ اگر وہ ناگوار بات کہہ دیں تو برداشت کرنے کی کوشش کرنی چاہیے اور اگر ان کو کسی فعل سے روکنا ہو تو نرمی واخلاق کے ساتھ منع کیا جائے ، اخلاق سے پیش آنے کے باوجود آپ کے والد صاحب آپ کو جو بد دعائیں دیتے ہیں اللہ تعالی سے امید ہے ان کی یہ بد دعائیں آپ کے لیے کسی قسم کے وبال کا ذریعہ نہیں بنیں گی، نیز آپ کے والد کے لیے مذکورہ حدیث ( تم اور تمہارا مال تمہارے باپ کے لیے ہے) کو مدِ نظر رکھتے ہوئے آپ کی دکان سے اشیاء فروخت کرنا درست نہیں ، اس حدیث کا صحیح مطلب یہ ہے کہ والد اگر محتاج ہو تو بیٹے کی مملو کہ اشیاء سے بقدر حاجت بغیر اجازت کے استعمال کر سکتا ہے ، اس طرح والد صاحب کی دوسری اہلیہ اور اس کی اولاد کا نفقہ آپ پر لازم نہیں ، لہذا ان کا نفقہ نہ دینے کی صورت میں آپ گناہ گار نہ ہوں گے ، البتہ اگر آپ کے والد خود صاحب مال نہیں تو ان کا نفقہ آپ کے ذمہ لازم ہے ، اور سوتیلی والدہ اور ان کے بچوں کی دیکھ بھال کرنا بھی آپ کے لیے باعثِ اجر و ثواب ہے۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
