میں نے اپنی والدہ کی زمین میں ان کی اجازت سے کھجوروں کے مخصوص اچھے درخت (دوڑے) لگائے ان کو لگانے میں کافی محنت و مشقت کی، وہاں پانی نہیں تھا، نلکے کی مدد سے وہاں پانی پہنچایا، اس کے بعد ان کی دیکھ بھال کی، والدہ سے ادب کی وجہ سے کبھی صراحتًا اس پر بات نہیں ہوئی کہ میں ان کا مالک ہوں، البتہ میرے دل میں یہی بات تھی کہ یہ درخت میرے ہیں، کیونکہ ان پر اخراجات میں نے خود کیے تھے ، اس کے بعد والدہ صاحبہ فوت ہو گئی۔ جب زمین تقسیم ہوئی تو وہ جگہ دوسرے بھائی کے حصہ میں آئی، انہوں نے کسی مفتی صاحب سے پوچھا تو انہوں نے کہا کہ جس کی زمین میں درخت آئے ہیں یہ اسی کے ہیں۔ آپ سے پوچھنا یہ ہے کہ شرعی اعتبار سے یہ درخت میرے ہوں گے یا جس بھائی کے حصے میں زمین آئی ہے اس کی ہو گی۔ نیز اس وقت دوسرے بھائی والدین کے تابع تھے اور بھائی والدین کی حسب توفیق کا شتکاری وغیرہ میں مدد بھی کرتے تھے اس کا کوئی بدل وغیرہ نہیں لیا جاتا تھا کیونکہ اکھٹے رہتے تھے ، باقی بھائی بھی اس بیان کی تصدیق کرتے ہیں۔