مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
مفقود کی بیوی کیسے علیحدگی اختیار کرسکتی ہے ؟
سوال
گزارش ہے کہ میرا رضاعی بیٹا وسیم اکرم ولد محمد اکرم جس کی عمر تقریبا 34 سال ہے جس کا میرے ساتھ بھتیجے کا رشتہ بھی ہے۔ وسیم اکرم شادی شدہ ہے اور اس کی شادی جولائی 2018ء میں اپنی خالہ کی بیٹی سے ہوئی۔ اس کا کوئی کاروبار بھی تھا اور جاب بھی کرتاتھا لیکن اس کا کاروبارہمارے علم میں نہیں تھا۔ 2022ء میں اس کو کوئی کاروباری نقصان ہوا، جس کی وجہ سے وہ بہت پریشان رہتا تھا ۔ چیک کیش نہ ہونے کی وجہ سے تھانہ گلبرگ میں ایف – ائی- آر بھی درج کرائی گئی، جس کے بعد ضمانت بھی ہوگئی تھی اور وہ دوبارہ سے نوکری کررہاتھا۔ فروری/2023ء کو وسیم اکرم گھر سے اپنی ڈیوٹی پر گیا اور واپس گھر نہیں آیا ۔ اس کی کمشدگی/ اغوا کی رپورٹ تھانہ ریس کورس لاہور میں زیر نمبر 22/360 درج کرائی گئی اور پولیس اس کی تلاش کررہی ہے۔ لڑکا باوجود تلاش کے ابھی تک نہیں ملا ہے۔ اس کی بیوی ثناء وسیم اب وسیم اکرم سے علیحدگی کا مطالبہ کررہی ہے جوکہ اس کی گمشدگی کے فورا بعد اپنے والدین کے گھر شفٹ ہوگئی تھی۔ جناب سے گزارش ہے کہ ہمیں اسلامی قوانین کی روشنی میں ایک فتوی جاری کیا جائے کہ کیا اور کیسے وسیم اکرم کی بیوی اس سے علیحدگی اختیار کرسکتی ہے ؟ اور اس کے کیا حقوق ہیں نیز کیا وسیم اکرم کے والد پر نفقہ دینا لازم ہے یا نہیں؟جناب کی عین نوازش ہوگی۔
جواب
ومذکورہ کی بیوی کے لئے اصل حکم یہ ہے کہ وہ عفت وعصمت کے ساتھ زندگی گزارے لیکن اگر وہ علیحدگی اختیار کرنا چاہے تو اس کے لئے جائز ہے ۔ اس کا طریقہ کار یہ ہے کہ وہ اپنا مقدمہ عدالت میں پیش کرے اور گواہوں سے ثابت کرے کہ وسیم اکرم سے میرا نکاح ہواتھا اور گواہوں سے اس کا مفقود ولاپتہ ہونا بھی ثابت کرے، اس کے بعد عدالت اس کی تفتیش وتلاش میں پوری کوشش کرے اور جب پتہ چلنے سے مایوس ہوجائے تو عورت کو چار سال تک مزید انتظار کا حکم دے ، پھر اگر ان چار سالوں میں بھی اس کا پتہ نہ چلے تو چار سال کی اختتام پر عورت دوبارہ دعوی دائر کرے اور عدالت شوہر کو مردہ تصور کرکے فسخ نکاح کا حکم جاری کرے اور عورت چار ماہ اور دس دن عدتِ وفات گزار کر دوسری جگہ نکاح کرسکتی ہے ۔
اگر عورت گناہ میں مبتلا ہونے کا شدید خطرہ ظاہر کرے تو ایسی صورت میں چار سال انتظا ر کرنے کا حکم ضروری نہیں بلکہ یہ دیکھا جائےگا شوہر کے غائب کے وقت سے اب تک کم ازکم ایک سال کا عرصہ گزر چکا ہے یا نہیں ،اگر گزرچکا ہے تو عدالت مزید مہلت دیے بغیر اس وقت بھی نکاح ختم کر سکتی ہے اسی طرح ا گر گناہ میں مبتلا ہونے کا خطرہ تو نہیں لیکن مفقود کا اتنا ما ل موجود نہیں جو ان چار سالوں میں بیوی کے نان و نفقہ کے لیے کافی ہو یا بیوی کے لیے مفقود کے مال سے نان و نفقہ حاصل کرنا مشکل ہو تو اس صورت میں اگر نان و نفقہ دیے بغیر کم از کم ایک ماہ گزرا ہو توعدالت نکاح ختم کر سکتی ہے ۔
واضح رہے کہ ان آخری دو صورتوں میں عدت وفات کی بجائے عدت طلاق گزارے گی جو عدالت کے فیصلے کے وقت سے شمار ہو گی۔ نیز وسیم اکرم کے دوران گمشدگی اس کی بیوی کا نان ونفقہ وسیم اکرم کے مال سے ادا کیا جائےگا اور اگر اس نے کوئی مال نہ چھوڑا ہو تو وسیم اکرم کے والد پر نفقہ دینا لازم نہیں۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
