مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
غیر صائم کا افطاری میں شریک ہونا اور تقریب ِنکاح میں ایک سے زائد ڈبہ وصول کرنا
سوال
نمبر ۱۔زید نے رمضان یا غیر رمضان میں لوگوں کی افطاری کااہتمام کیا اب زید نے تو روزہ داروں کیلئے صرف اہتمام کیا لیکن اس کی کبھی صراحت نہیں ، اب اگر صائمین میں غیر صائم آدمی بیٹھ کر کھاپی لے تو اس کیلئےیہ کھانا حلال ہے یا نہیں ؟ زید کی عدم صراحت کے باوجود زید اس بات کو پسند نہیں کرتا کہ کوئی غیر صائم آکر صائمین کے ساتھ کھائے ، معلوم ہونے پر غیر صائم کو اٹھا بھی دیتا ہے ؟
نمبر ۲۔زید نے اپنی تقریب ِ نکاح میں نکاح کے بعد ایک ایک ڈبہ مٹھائی حاضرین میں تقسیم کی، حاضرین میں سے بعض نے چپکے سے دو دو یا چارچار ڈبے وصول کرلئے جس کی وجہ سے حاضرین میں سے کچھ ایسے لوگ بھی تھے جن کو کچھ نہ ملا۔ اب سوال یہ ہے کہ ایک سے زیادہ ڈبے وصول کرنےوالوں کےلئے ایسا کرنا حلال ہے یا حرام ؟ کیا مٹھائی ان کےلئے حلال ہے اور کیا اس وجہ سے یہ آخرت میں مستحق سزا نہیں ہوں گے ؟
نمبر ۳۔مدرسہ میں جو طلباء ناظم مطبخ اور مجلس منتظمہ کی بغیر اجازت کے کوئی چیز اٹھا کر کھالیں یا استعمال کرلیں یا خدمت والے حضرات سالن کی تقسیم سے قبل اچھا گھی والا سالن نکال کرکھائیں کیا ایسا کرنا ان کیلئے حلال ہے یا حرام ؟ کیا ایسا کرنے سے دوسروں کی حق تلفی لازم نہیں آتی ؟۔
جواب
نمبر ۱،۲۔صورتِ مسئولہ میں اگر مالک کی طرف سے غیر روزہ دار کو افطار ی میں شرکت اور مٹھائی لینے والوں کو ایک سے زائد ڈبہ لینے کی اجازت نہیں جیسا کہ سوال سے یہی ظاہر ہورہا ہے تو اس صورت میں غیر صائم کیلئے افطاری میں شریک ہونا یا کسی کےلئے مٹھائی کا ایک سے زائد ڈبہ لینا ہرگز جائز نہیں، البتہ اگر افطاری کا اہتمام کرنیوالے اور نکاح کی تقریب میں مٹھائی کے ڈبے تقسیم کرنیوالے کی جانب سے صراحتاًیا دلالۃً اجازت پائی جارہی ہو تو غیر صائم کیلئے افطاری میں شریک ہونے اور تقریب ِ نکاح میں شریک کسی فرد کیلئے ایک سے زائد ڈبے وصول کرنے کی گنجائش ہے ۔
نمبر ۳۔مدرسہ میں پکنے والے کھانے میں تمام طلباء کا حق مشترک ہوتا ہے ۔اسی لئے منتظم کی اجازت کے بغیر سوال میں ذکر کردہ تمام تصرفات ناجائز اور سخت گناہ ہیں ان سے اجتناب ضروری ہے ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
