سائل ایک سکول کا مالک ہے اور یہ سکول ابھی ابتدائی مراحل میں ہے اور سرمایہ کاری چل رہی ہے اور میں اس پر اپنی جمع پونجی انویسٹ کر چکا ہوں ۔صورتحال یہ تھی کہ ادارے کو اپنے موجودہ اخراجات پورا کرنے اور نفع بخش ہدف حاصل کرنے کے لیے مزید سرمایہ کاری کی اشد ضرورت تھی اور اس کے لیے قرض کا حصول ناگزیر ہو گیا۔ کافی دوڑ دھوپ کے بعد سکول ہی کے طلباء میں سے ایک بچی کے والدین سے بات ہوئی جنہوں نے اپنی رقم میزان بینک میں ٪1.83فیصد ماہانہ منافع کی بنیاد پر ڈیپازٹ کر رکھی تھی۔ تو سائل نے سرمایہ کاری کے حصول کے لیے انہیں بینک سے دوگنا منافہ یعنی٪3.7 ادا کرنے کی پیشکش کی جو کہ انہوں نے قبول کی اور سرمایہ کاری پر رضامند ہوئے انہوں نے مبلغ 15 لاکھ روپے انویسٹ کیے۔ تو اگلا معاملہ یہ تھا کہ انہیں منافع ادائیگی کس بنیاد پر کی جائے گی ،کیونکہ اسکول تو ایک سروس انڈسٹری ہے اور ہم اشیاء یعنی پروڈکٹس کے بجائے اپنی سروسز فروخت کرتے ہیں تو غور و خوض کے بعد یہ معاملہ نفع نقصان کی بنیاد پر اس طرح طے ہوا کہ ایک کلاس یعنی K.G)) کو دکان تصور کرتے ہوئے اس سے حاصل ہونے والی ماہانہ فیس جو کہ تقریبا 81 ہزار روپے بنتی ہے کا٪ 65 سرمایہ کار کو اس طرح ادا کیا جائے گا کہ طلباء کی موجودہ تعداد میں جتنا اضافہ ہوا تو سرمایہ کار کا منافع بھی یقینا 65 فیصد کے حساب سے رقم کی صورت میں بڑھتا جائے گا کیونکہ فیس وصولی میں اضافہ ہو جائے گا اور اسی طرح اگر تعداد کم ہوتی ہے تو فیس وصولی بھی کم ہوگی تو اس کا٪ 65 فیصد بھی کم ہو جائے گا یہاں طلبہ و طالبات کی تعداد میں کمی اور اضافے کو منافع میں فرق کی بنیاد بنایا گیا ہے جبکہ رقم فکس نہیں کی گئی۔