جس عورت كا خاوند گم ہو جائے ،اس کے زندہ ہونے یا نہ ہو نے کی خبر نہ ہو ایسی عورت کو زوجہ مفقود کہا جاتا ہے ،اس کے لیے بہتر یہ ہے کہ اگر عورت خاوند کے بغیر عفت کی زندگی گزار سکے تو گزار لے اور اگر اسے خاوند کے بغیر گناہ میں مبتلا ہونے کا خدشہ ہو تو وہ قاضی کی عدالت میں جائے اور گواہوں سے ثابت کرے کہ اس کا خاوند گم ہو چکا ہے ،قاضی خاوند کو تلاش کروائے جہاں اس کے ملنے کی امید ہو ،اور جہاں امید کم ہو وہاں ذرائع ابلاغ سے معلوم کروائے اگر تلاش کے تمام ذرائع اختیار کرنے کے باوجود خاوند کی کوئی خبر نہ مل سکے ،عدالت خاوند کے مردہ ہونے کا فیصلہ کرے گی اور عورت چار سال تک انتظار کرے گی اس کے بعد عورت عدالت سے دوبارہ درخواست کرے گی تو عدالت نکاح کو فسخ کر ےگی اور چار ماہ دس دن کی عدت پوری کرے گی اوراگر عورت گناہ میں مبتلا ہونے کا شدید خطرہ ظاہر کرے تو ایسی صورت میں چار سال انتظا ر کرنے کا حکم ضروری نہیں بلکہ یہ دیکھا جائےگا کہ شوہر کے غائب ہونےکے وقت سے اب تک کم ازکم ایک سال کا عرصہ گزر چکا ہے یا نہیں ،اگر گزرچکا ہے تو عدالت مزید مہلت دیے بغیر اس وقت بھی نکاح ختم کر سکتی ہے اسی طرح ا گر گناہ میں مبتلا ہونے کا خطرہ تو نہیں لیکن مفقود کا اتنا ما ل موجود نہیں جو ان چار سالوں میں بیوی کے نان و نفقہ کے لیے کافی ہو یا بیوی کے لیے مفقود کے مال سے نان و نفقہ حاصل کرنا مشکل ہو تو اس صورت میں اگر نان و نفقہ دیے بغیر کم از کم ایک ماہ گزرا ہو عدالت نکاح ختم کر سکتی ہے ۔ واضح رہے کہ ان آخری دو صورتوں میں عدت وفات کی بجائے عدت طلاق گزارے گی جو عدالت کے فیصلے کے وقت سے شمار ہو گی۔