اصل جواب سے پہلے بطور تمہید یہ بات سمجھ لیں کہ اولاد پر والد کا بہت بڑا حق  ہے، اللہ سبحانہ و تعالی اور نبی کریم صلی اللہ علیہ وسلم نے والد کے ساتھ حسن سلوک اور اچھے برتاؤ کی بڑی تاکید فرمائی ہے، چنانچہ اللہ تعالی نے قرآن کریم میں متعدد مقامات پر توحید کا حکم دینے کے بعد والدین کے ساتھ حسنِ سلوک کا حکم دیا ہے۔ اسی طرح اللہ کے رسول ﷺ نے ایک حدیث میں ارشاد فرمایا کہ: “رب تعالیٰ کی خوشنودی والد کی خوشنودی میں ہے اور رب تعالیٰ کی ناراضی والد کی ناراضی میں ہے” ۔یہاں تک کہ اگر والد  فاسق اور کافر بھی ہو تب بھی جائز امور میں اس کی اطاعت کرنے اور اس کے ساتھ حسن سلوک کا حکم دیا گیا ہے ۔ نیز بیٹوں کو والد کے احتساب اور اس سے پوچھ گچھ کا حق بھی حاصل نہیں بلکہ اگر والد بالفرض کسی غیر شرعی کام میں بھی مبتلا ہو تب بھی بیٹوں کے لئے حکم یہ ہے کہ والد کو ایک مرتبہ نرمی کے ساتھ سمجھا دیں ،پھر بھی اگرنہ رکے تو اس کے لئے توبہ واستغفار اور دعا کریں ، سختی اور بے ادبی سے پیش نہ آئیں ۔ والد کے حقوق کی اہمیت کا اندازہ شریعت کے اس مسئلہ سے بھی لگایا جا سکتا ہے کہ باوجودیہ کہ قتل ایک سنگین جرم اور گناہ کبیرہ ہے لیکن اگر خدانخواستہ بیٹا باپ سے قتل ہو جائے تو باپ سے قصاص نہیں لیا جاتا۔ واقعہ مذکورہ تمہید کے بعد اصل مسئلہ یہ ہے کہ صورت مسئولہ میں اگر بیٹا باپ کا سخت نا فرمان ہے اور اس کی اصلاح کی کوئی صورت ممکن نہیں تو باپ کے لئے اس بات کی گنجائش ہے کہ اس کے علاوہ دوسرے ورثاء یا غیر ورثاء میں اپنے مال کو تقسیم کر کے ، اپنی زندگی میں ہی ان کو اس کا مالک بنا دے اور اس بیٹے کو وراثت سے محروم کر دے، انشاء اللہ امید ہے کہ ایسا کرنے سے والد گناہ گار نہیں ہوگا۔ اور اس طرح کرنے سے وہ عملاً عاق ہو جائے گا۔نیز واضح رہے کہ خدانخواستہ بیٹا باپ کو قتل کر دے تو بیٹا جائیداد اور وراثت سےمحروم ہو جائے گا۔