صورتِ مسئولہ میں اگرزیداپنی صحت والی زندگی میں اولاد کے درمیان جائیداد تقسیم کرنا چاہتا ہے تو شریعت کی رُو سے وہ ایسا کر سکتاہے لیکن شرعاً یہ تقسیم ہبہ (گفٹ) کہلائے گی ، نہ کہ میراث۔اور اس کا طریقہ کاریہ ہے کہ زید سب سے پہلے اپنی بقیہ زندگی کے لئے بقدرِ ضرور ت مال رکھ لے تاکہ بعد میں اسے کسی کا محتاج نہ ہونا پڑے ،اور اپنی بیوی(جو اس وقت اس کے نکاح میں ہے) کو آٹھواں حصہ دے دے، اس کے بعد بقیہ مال دونوں بیویوں کی اولاد( تین بیٹوں اور تین بیٹیوں) میں برابر تقسیم کر دے یعنی بیٹیوں کوبیٹوں کے برابر حصّہ دے اور اگر میراث کے اصول کے پیشِ نظر بیٹیوں کو بیٹوں کے حصّے سے آدھا دینا چاہے تو اس کی بھی گنجائش ہےنیز اگر کوئی اولاد زیادہ فرمانبردار ہو ، نیک ہو یازیادہ ضرورت مند اور عیال دار ہو یا کوئی بچہ تعلیم میں مشغول ہو تو اس صورت میں اس کو دوسروں سے کچھ زیادہ دینا بھی درست ہے ۔لیکن اس بات کاخیال رکھنا ضروری ہے کہ جس کو جو کچھ دیا جائے باقاعدہ عملاًتقسیم کرکے مالک وقابض بناکر دیاجائے صرف کاغذات میں نام کرادینا یا مشترکہ طور پر دینا کافی نہیں۔