مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
جھگڑے کے دوران تین طلاقیں دینا
سوال
میں نے اپنی بیوی کو ایک ماہ پہلے جھگڑے کے دوران تین مرتبہ پشتو میں طلاق کے الفاظ کہے،جن کا اردو ترجمہ یہ ہے کہ”تو مجھ پر طلاق ہے ، تو مجھ پر طلاق ہے ، تو مجھ پر طلاق ہے “۔ ساتھ یہ بھی کہا کہ” تو میری ماں ہے ،تو میری ماں ہے،تو میری ماں ہے “۔اس سے میری نیت حرمت کی تھی ۔ میری بیوی نے اس کے جواب میں تین مرتبہ کہا کہ تو میرا بھائی ہے ، تو میرا بھائی ہے ،تو میرا بھائی ہے۔
جواب
صورت ِمسئولہ میں تین طلاقیں واقع ہو کر نکاح ختم ہوگیا اور حرمت مغلظہ ثابت ہو چکی ہے،لہٰذا اب رجوع نہیں ہوسکتا اورآپس میں نکاح بھی نہیں ہوسکتا۔ البتہ مطلقہ عورت عدت گذارنے کے بعداگر کسی دوسرے آدمی سے شرعی گواہوں کی موجودگی میں مہر کے ساتھ نکاح کرےاور ہمبستری کے بعد دوسرا شوہر فوت ہوجائےیا ہمبستری کے بعدوہ اسےخودکسی وجہ سے طلاق دیدےتو اس دوسرے شوہرکی عدت گزرنے کے بعد دوبارہ آپ سے نئے مہر کے ساتھ گواہوں کی موجودگی میں نکاح ہو سکتا ہے،اس کے بغیر مطلقہ کاآپ کے ساتھ ملنااورآپ دونوں کا آپس میں میاں بیوی کی حیثیت سے اکٹھے رہنا ہرگز جائز نہیں ہے بلکہ حرام اور سخت گناہ ہے۔
نیز صورت مسئولہ میں جب تین طلاقیں واقع ہو کر حرمت مغلظہ ثابت ہو چکی ہے تو اس کے بعد ان الفاظ ”تو میری ماں ہے ۔۔۔۔۔”پر کوئی حکم نہیں لگے گا۔ اور”سورۃ مجادلۃ” میں ظہار سے متعلق جس کفارے کا تذکرہ ہے،وہ حکم بھی ان مذکورہ الفاظ پر نہیں لگتا ۔
واضح رہے کہ جو لوگ ایک مجلس کی تین طلاقوں کو ایک ہی طلاق قرار دیتے ہیں ،ان کا مؤ قف درست نہیں،بلکہ قرآن و سنت اور اجماع امت کے خلاف ہے ۔ لہٰذا اس پر عمل کرنا آپ کے لئے ہرگز جائز نہیں ہے ۔
جہاں تک تعلق ہے حلالہ کے حکم کا تو حلالہ مطلقا ناجائز نہیں ہے ،بلکہ اس کی ناجائز صورت یہ ہے کہ دوسری جگہ یہ طے کر کے نکاح کرنا کہ شوہر کچھ عرصہ کے بعد طلاق دےگا، حدیث شریف میں اس پر لعنت وارد ہوئی ہے۔ جیساکہ آپ کے ارسال کردہ فتویٰ میں “سنن ابی داؤد اور سنن ابن ماجہ “کی دو حدیثوں سے معلوم ہوتا ہے، البتہ جو تفصیل اوپر ذکر کی گئی ہےکہ دوسرے آدمی سے شادی اور ہمبستری کے بعد وہ فوت ہو جائے یا کسی وجہ سے طلاق دیدے تو عدت گذار کر پہلے شوہر سے نکاح جائز ہو جاتا ہے ، یہ قرآن وسنت سے ثابت ہے اور ایسا کرنا موجب لعنت نہیں ہے ۔ چنانچہ” صحیح بخاری “میں حضرت عائشہ رضی اللہ عنہا کی روایت موجود ہے “ایک شخص نے اپنی بیوی کو تین طلاقیں دیں پھر اس خاتون نے دوسری جگہ شادی کی اور ہم بستری سےپہلے دوسرے شوہر نے اس کو طلاق دیدی تو حضور اکرم ﷺ سے پوچھا گیا کہ کیا یہ خاتون اپنے پہلے شوہر سے شادی کرسکتی ہے ؟آپ ﷺ نے ہمبستری کے بغیر پہلے شوہر کے ساتھ شادی کو حرام قرار دیا ۔اسی طرح قرآن کریم(سورة بقرة:آیت نمبر230) سے بھی یہ بات بڑی وضاحت سے معلوم ہوتی ہے کہ تین طلاقوں کے بعد بیوی شوہرپر اس وقت تک حرام ہو جاتی ہے ، جب تک وہ دوسرے شوہر سے نکاح اور ہمبستری نہ کرلے ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
