مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
جو قرضہ مرحوم نے بیٹی کو دینے کے لیے اپنے بیٹے سے لیا تھا اس قرض کا مطالبہ بیٹا اپنی بہن سے کرسکتا ہے؟
سوال
بندی کے والد صاحب رحمۃ اللہ علیہ کا انتقال ہوگیا ہے، میری کچھ رقم میرے والد صاحب کے پاس تھی اور انہوں نے وہ رقم اپنے ایک بیٹے کے ذریعے کہیں کاروبار میں لگوادی تاکہ وہ بڑھتا رہے۔ پھر کچھ عرصہ بعد ہم نے ایک مکان خریدا اس وقت اپنے والد صاحب سے کہا کہ اس کی ادائیگی کر نی ہے ، میری رقم مجھے مل جائے تو ادائیگی ہوجائے گی، فرمایا کہ ابھی فوراً ممکن نہیں، پھر میں نےعرض کیا کہ اس کی ادائیگی کہاں سے اور کیسے ہوگی؟ تو فرمایا کہ اللہ کرائے گا۔ خیر جب لین دار کی طرف سے شدید تقاضہ ہوا تو والد صاحب نے رقم دی اور فرمایا کہ یہ دیدو، پھر کچھ عرصہ بعد انہوں نے فرمایا کہ جو رقم مکان کے لیے دی تھی وہ رقم تم نے واپس کرنی ہے، تو میں نے والد صاحب سے عرض کیا کہ میں کہاں سے دوں گی؟ تو فرمایا لکھ کر دیدو کہ میری رقم جو آئے گی اس میں سے ادا کی جائیگی اور اب میرا وہ بھائی جس سے والد صاحب نے رقم لے کر دی تھی وہ مجھ سے مطالبہ کررہا ہے ۔ اب مسئلہ یہ ہے کہ کیا میں اپنے بھائی کی مقروض ہوئی؟ اور والد صاحب رحمتہ اللہ علیہ میرے مقروض ہوئے؟
اور میرے والد صاحب رحمۃ اللہ علیہ کا انتقال ہوگیا ہے اور میرے والد کے ذمہ جو قرض ہے وہ ابھی تک ادا نہیں کیا گیا ان کے ترکہ میں سے جبکہ بھائی یہ کہتے ہیں کہ یہ تو اس کے ذمہ ہے جس کے ذریعہ سے والد صاحب نے رقم لگوائی تھی۔
صورتِ حال یہ ہے کہ رقم جہاں لگی تھی وہاں سے آئی ہے، اس کے بارے میں سب ورثا کو معلوم ہے اور یہ والد صاحب کی زندگی میں آئی، اس وقت والد صاحب نے یہ فرمایا تھا کہ یہ رقم تیسرے بیٹے کے اکاؤنٹ میں ڈلوادو، یہ نہیں فرمایا کہ یہ بہن کو دیدو یا دوسرے بیٹے کو، وہ رقم تیسرے بیٹے کے اکاؤنٹ میں ہی آئی بظاہر وہ اپنے عوارضات اور تکالیف کی وجہ سے نہ فرماسکے کچھ آخیر وقت میں یاداشت کا بھی عذر ہوگیا تھا اور آخیر عمر میں عوارضات اور علالت کی وجہ سے میں نے تقاضہ بھی نہیں کیا، البتہ میں نے معاف بھی نہ کئے تھے۔ یہ بات بھی بھائیوں کے علم میں ہے کہ بہن کے پیسے آنے تھے لیکن انہی میں سے بعض حضرات یہ کہتےہیں کہ وہ پیسے ترکہ کے ہیں، معاملہ فہمی پر بات ہوگی، آپ اپنے پیسے اس بھائی سے مانگیں اور بھائی یہ کہتا ہے کہ میں بجھوا چکا ہوں اور یہ بات کئی دفعہ کہہ چکا ہوں کہ یہ پیسے بہن اور ان کی بچوں کے ہیں تحریری طور پر بھی اور اعلانیہ بھی۔ آپ حضرات ہماری راہنمائی فرمائیں کہ یہ رقم ہماری بنتی ہےیا ترکہ میں جائے گی اور یہ جو تین سال کا عرصہ گزرا ہے اس کی زکات کا کیا حکم ہے آیا جو استعمال کررہا ہے وہ دیگا یا کسی اور کے ذمہ ہوگی؟
ملحوظہ: ابتداء میں تو معلوم نہیں تھا کہ پیسے کہاں سے دئیے ہیں ، بعد میں معلوم ہوا کہ یہ پیسے فلاں بیٹے سے لے کر دیے ہیں۔ اس کے بعد تحریر بھی لکھوائی کہ جب تمہارے پیسے آئیں گے تو واپسی کروں گی فلاں بیٹے کو، لیکن کسی موقع پر تینوں فریقوں کی باہمی رضامندی سے ایسا کوئی معاملہ قطعًا طے نہیں ہوا کہ والد صاحب نے یہ کہا ہوکہ میں بیچ میں سے نکلتا ہوں اور اس قرض سے اب میرا کوئی تعلق نہیں ہے اور اب اس قرض کی ادائیگی آپ نے کرنی ہےجسے قرض دینے والے بیٹے نے قبول بھی کیا ہو، ایسی کوئی بات نہیں ہوئی یعنی( ایسی کوئی نشست نہیں ہوئی نہ زبانی اور نہ تحریری)۔
جواب
صورتِ مسئولہ میں بیٹے نے چونکہ والد صاحب کو قرض دیاتھا اور بعد میں حوالہ کا عقد بھی تام نہیں ہوا اس لئے مرحوم کا بیٹا اپنی بہن سے والد کو دیئے گئے قرض کا مطالبہ نہیں کر سکتا، البتہ بہن کے ذمہ چونکہ والد مرحوم کا قرض ہے اور بہن کی رقم بھی ابھی تک ادا نہیں کی گئی، لہٰذا بہن کی وصول کردہ رقم اگر اتنی ہی ہے جتنی والد کےپاس انوسٹ کی گئی تھی تو اس رقم کے تیسرے بیٹے کے اکاؤنٹ میں آنے پردونوں کا مقاصہ ہوگیا اور کسی کے ذمہ کچھ نہ رہے گا اور اگر فرق ہو تو ورثا اس فرق کا لین دین کرلیں۔
مقاصہ سے پہلے انوسٹ کی ہوئی رقم بیٹی کی ملکیت تھی جس پر زکات اداکرنا بیٹی پر لازم تھا البتہ قابل زکات مال میں سے کل واجب الاداء قرضہ بھی منہا کیاجائے گا۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
