واضح رہے کہ حرام نشے کی حالت میں دی ہوئی طلاق واقع ہوجاتی ہے۔صورتِ مسئولہ میں اگر واقعۃ ً آپ کے شوہر نےنشے کی حالت میں آپ کو تین مرتبہ یہ الفاظ ” آج میں نے اسے پہلی طلاق دی” کہے ہیں ،جس میں چونکہ لفظ ’’پہلی‘‘صریح اور منطوق ہے ۔اورمذکورہ شخص کی نیت دوسرے دو جملوں سےمزید طلاق دینے کی معلوم نہیں ہو تی، بلکہ پہلے کی تاکیدیا خبربنا نا مقصودہے ۔اس لئے ایسی صورت میں شرعا ً آپ پر ایک طلاق رجعی واقع ہوگئی ہے ۔جس کا حکم یہ ہے کہ عدت کے دوران شوہر کو(قولاً یا عملاً ) رجوع کر نے کا حق حاصل ہے اور عدت گذرنےکے بعد آپ دونوں کا نکاح باہمی رضامندی کے ساتھ نئے مہر پر نئے ایجاب و قبول کے ساتھ گواہوں کی موجودگی میں ہو سکتا ہے ۔جس کے بعد شوہر کو صرف دو طلاقوں کا حق باقی ہوگا ۔یعنی دو طلاقیں بھی دیدیں تو بیوی پرطلاق مغلظہ واقع ہو کر حرام ہو جائے گی ۔ اس لئے آ ئندہ طلاق کے معاملے میں اس پر انتہائی احتیاط لازم ہے ۔