پھر ایک دن اس آدمی نے مجھے فون پہ بات کرتے ہوئے سن لیا تو دوسرا فون بھی لے لیا جس پہ میں اپنی سہیلی سے بات کررہی تھی۔ پھر اس کو شک ہوا کہ میں لیپ ٹاپ کے ذریعے والدین سے رابطہ کرتی ہوں اور ان کو میسج کرتی ہوں تو اس نے لیپ ٹاپ بھی لے لیا۔ لیپ ٹاپ سے بھی میں اپنی سہیلی کو خیر خیریت کا میسج کرتی تھی۔ جب اس کی مرضی ہوتی تھی تو فون پہ بات کروا دیتا تھا۔ ( وہ بھی یہ ریکارڈ کرتا تھا) اور جب مرضی نہیں ہوتی تھی تو فون ہی نہیں اٹھاتا تھا۔ ایک سال میں تین عیدیں گزریں یہ تینوں عیدوں پہ مجھے والدین سے ملوانے نہیں لایا اور جب سال بعد میرے والدین بھائی اور ماموں آئے تو اس نے مجھے والدین سے پھر بھی ملنے نہیں دیا۔ صرف ماموں کو اندر بلایا۔ اور ماموں کے آگے بھی یہی کہا کہ اگر تم گئیں تو تمہیں تین طلاقیں ہیں۔( اس میں اس نے آئندہ کا لفظ بھی استعمال نہیں کیا اور ابھی کا لفظ بھی استعمال نہیں کیا) بس یہی کہا کہ اگر گئیں تو تین طلاقیں ہیں۔ اس دن میں نہیں گئی۔ پھر جب میرے والدین بھائی اور ماموں پولیس کو لے کر آئے تو میرے والد نے کہا کہ جانے کی اجازت دے دیں لیکن یہ خاموش رہا اس نے کچھ نہیں بولا۔اس نے نہ اجازت دی اور نہ منع کیا ( کیونکہ وہ منع کر بھی نہیں سکتا تھا پولیس کے آگے) اسے پتہ چل گیا تھا کہ اب میں چلی جاؤں گی۔ پھر میں اپنے والدین کے ساتھ آگئی۔