سوال میں ذکر کردہ تفصیل اگر واقعتاًدرست ہےتو اس صورت میں آپ پر تین طلاقیں واقع ہو کر حرمت مغلظہ ثابت ہو گئی ۔آپ ایک دوسرے پر حرام ہو چکے ہیں اس لیے آپ دونوں پر لازم ہے کہ فوراً ایک دوسرے سے علیحدہ ہو جائیں ۔مذکورہ صورت میں شوہر اگر چہ طلاق کا منکر ہے لیکن آپ نے جب خود اپنے کانوں سے تین طلاق کے الفاظ سنے ہیں تو آپ کے لیے اس کے ساتھ رہنا ہر گز جائز نہیں ۔اگر وہ آپ کو اپنے سا تھ رہنے پر مجبور کرےتو آپ مہر کی معافی یا کسی اور جائز طریقے سے اس سے طلاق کا اقرار کرواکر خلاصی حاصل کرلیں۔اگر اس پر بھی آمادہ نہ ہو تو عدالت کےذریعے خلع حاصل کرکے آگے شادی کر سکتی ہیں ۔بشرطیکہ عدت گزر چکی ہو ۔واضح رہے کہ شوہر کی رضامندی کے بغیر شرعاً خلع صحیح نہیں ہو تا البتہ مذکورہ صورت میں چونکہ پہلے ہی طلاق واقع ہو چکی ہے اس لیے قا نونی تحفظ کی خاطر عدالتی خلع کے حصول کے لیے عدالت سے رجوع کرنے کی گنجائش ہے۔