نمبر 1- صورت مسئولہ میں آپ کے علاتی (باپ شریک )بھائی نے انتقال کے وقت اپنی ملکیت میں جو کچھ منقولہ وغیر منقولہ مال وجائیداد ،مکان اور پلاٹ ،نقد رقم ،سونا ،چاندی ،کپڑے اور برتن وغیرہ اور ہر طرح کا چھوٹا بڑا سازوسامان چھوڑا ہے ،نیز مرحوم کا وہ قرض جو کسی شخص یا ادارے کے ذمہ واجب الادا ء ہووہ سب مرحوم کا ترکہ ہے ۔ اس میں سے سب سےپہلےمرحوم کے کفن ودفن کے متوسط اخراجات اداکیے جائیں ، اگر یہ اخراجات کسی نے اپنی طرف سے بطورِاحسان اداکردیے ہوں تو مرحومہ کے ترکہ سے یہ اخراجات نہیں نکالے جائیں گے ۔اس کے بعد دیکھیں کہ اگر مرحوم کے ذمہ کوئی قرض ہو یا بیوی کا مہر واجب الاداء ہو تو اس کو مرحوم کے ترکہ سے اداکیاجائے۔پھر دیکھیں کہ اگر مرحوم نے کسی غیروارث کے حق میں کوئی جائز وصیت کی ہےتوبقیہ ترکہ کے ایک تہائی (3/1) حصہ کی حد تک اس پر عمل کیاجائے۔ اس کے بعد جومال بچے اس کے کل بارہ (12)برابر حصے کرکے ہر حقیقی بھائی کو دو (2) اور ہر حقیقی بہن کو ایک (1)حصہ دے دیں ، واضح رہے کہ سگے بھائی موجود ہونے کی وجہ سے شرعاً باپ شریک بہنیں محروم ہو جاتی ہیں؛ لہٰذا صورت مسئولہ میں باپ شریک بھائی کے ترکہ میں آپ تینوں بہنیں شرعاً حق دار نہیں ۔