سوال سے بظاہر یہ معلوم ہوتاہے کہ والد صاحب نے پہلے پلاٹ اپنے لئے خریدا تھا اور بعد میں آپ کے کہنے پر والد صاحب نے آپ کو وہ پلاٹ فروخت کیاتھا اور یہ کہا کہ اس کی قیمت آپ اداکردیں اور آگے چل کر آپ نے والد صاحب سے یہ سودا کینسل کرنے کا کہا لیکن انہوں نے وہ کینسل نہیں کیا جس سے بظاہر یہ لگتا ہے کہ وہ پلاٹ آپ کی ملکیت ہے ؛ کیونکہ جو خریداری کا معاملہ آپ اور آپ کے والدکے درمیان ہوا وہ برقرار ہے، اسے آپ حضرات نے فسخ نہیں کیا، اگر صورتِ حال ایسے ہی ہےتو اس صورت میں چونکہ یہ پلاٹ آپ کی ملکیت ہے اور آپ نے بیچنے کی نیت سے نہیں خریدا تھا تو آپ پر اس کی زکوٰۃ نہیں ہے۔ اور اگر آپ نے بیچنے کی نیت سے خریدا تھا اور وہ نیت ابھی تک برقرار ہے تو اس کی موجودہ قیمت کے اعتبار سے آپ پر اس کی زکوۃ فرض ہوگی۔ اور اگر آپ کے اور والدِ گرامی کے مابین خریداری کا معاملہ ختم ہوگیا تھا لیکن والد صاحب نے اپنے بائع سے معاملہ کینسل نہیں کیا تو یہ پلاٹ آپ کے والدِ گرامی کی ملکیت ہے آگے بیچنے کی نیت سے خریدنے کی صورت میں ان پر اس کی زکوۃ فرض ہوگی اور آپ کی ادا کردہ رقم قرض متصور ہوگی جس کی زکوۃ آپ پر فرض ہے۔