مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
اپنی جائیداد سے خیرات اور بیٹی کی شادی کے لیے وصیت کرنے کا حکم
سوال
ایک والد نے فوت ہوتےوقت اپنی جائیدادمیں ایک مکا ن اور نقد رقم چھوڑی ۔مرحوم نے نقد ی کے بارے وصیت کی کہ اس رقم سے میری بیٹی کی شادی کردی جائے جو رقم باقی بچے اس سے میرے مرنے کے بعد خیرات کی جائے، اس بات کی گواہ وہی بیٹی ہے ۔جس کی اس رقم میں شادی کردی گئی ہے ۔ باقی بچو ں کو اس وصیت کا علم نہیں۔ اور وہی بیٹی کبھی کہتی ہے کہ اس رقم سے خیرات کرنی ہے اورکبھی کہتی ہے کہ اس رقم سے برسی کے موقع پر خیرات کرنی ہے ۔
والد مرحوم کی وصیت کتنی رقم میں پوری کی جا ئے گی؟ اور کیا برسی وغیرہ کے متعلق سے وصیت قابل قبول ہے ؟ مزید یہ کہ مرحوم کی وصیت خیرات سے متعلق ساری جائیداد میں سے پوری کی جا ئے گی یا صرف نقدی میں ؟ اور وہ بھی کتنا حصہ ؟ جبکہ مرحوم کا اشارہ وصیت کے وقت نقدی کی طرف تھا کہ اس میں سے شادی اور بقیہ رقم سے خیرات کی جائے ۔ مسئلہ ہذا کا جواب عنایت فرمائیں۔
جواب
وصیت کرنا
واضح رہے کہ مرحوم کے انتقال کے وقت اس کی ملکیت میں موجود منقو لہ و غیر منقو لہ حلال مال و جائیدادمیں سے ہر چھوٹی بڑی چیز(مثلا سونا ،چاندی ،زیورات، نقدی ،سامان تجارت وغیرہ ) سب مرحوم کا شرعی ترکہ ہے جس سے چارحقوق بالترتیب متعلق ہوتے ہیں اسی ترتیب کی رعایت سےان کو ادا کرنا ضروری ہے : سب سے پہلے تجہیزوتکفین کے متوسط اخراجات اس ترکے سے نکا لے جائیں بشرطیکہ کسی نے تبرعا ً ادا نہ کئے ہوں ۔پھرقرضوں کی ادائیگی کی جا ئے اگر مرحوم کے ذمہ ہوں ۔پھرجائز وصیت ایک تہائی مال کی حدتک پوری کی جائے ۔اس کے بعد بچا ہوا ترکہ ورثاء میں شرعی حصص کے مطابق تقسیم کیا جائے۔ اس وضاحت کے بعد مذ کورہ صورت میں والد کو بیٹی کی شادی کے لئےوصیت نہیں کرنی چاہئےتھی کیونکہ وارث کے لئے وصیت ناجائز ہے ۔ تاہم فی الحال اگر تمام ورثاء اجازت دیں تو و صیت کا نفاذدرست ہوگا لیکن اگر ورثاء اجازت نہ دیں تو بیٹی کا جو ترکہ میں سے حصہ ہےاس سے اس کی شا دی کے اخراجات پورے کرنے چاہئے۔
نیزمصرف خیرات سےمتعلق ایک تھا ئی مال کے حد تکوہ وصیت پوری کرنی چاہئےجودرست ہواورمیت کے لئے ایصال ثواب کا باعث ہو (مثلا مسجد، مدرسہ دینی جا ئز رفاہی کا م وغیرہ )۔ وہ وصیت پوری کرنا ناجائز ہے جو شرعا نا جائز ہو (مثلا برسی چہلم وغیرہ )۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
