مطلوبہ فتوی کے حصول کے لیے الفاظ منتخب کریں
عنوان کا انتخاب کریں
.
احرام کہاں سے باندھیں؟ مکہ مکرمہ پہنچ کر فورا عمرہ کرنا ضروری ہے؟کیا عمرہ کی نیت کرتے وقت نفل پڑھنا ضروری ہے یا تلبیہ کا فی ہے؟ نابالغ بچہ کو عمرہ کروانے کا طریقہ کیا ہے؟
سوال
ایک سائل کے چند سوالات ہیں۔ جوابات عنایت فرمائیے۔
نمبر۱۔ لندن سے ڈائریکٹ فلائٹ ہے جدہ کے لیے۔ احرام کا کیا حکم ہوگا؟
نمبر۲۔ ہوٹل پہنچتے ہی اگر عمرہ نہ کریں بلکہ غسل اور آرام کرکے عمرہ ادا کریں تو جائز ہوگا؟
نمبر۳۔ عمرہ کی نیت کے ساتھ ۲ رکعت پڑھنے کا کیا حکم ہے؟ کیا صرف تلبیہ پڑھنا کافی ہوگا یا دورکعت نفل ضروری ہیں؟
نمبر۴۔ بیٹا جس کی عمر ۴ سال ہے اس کو اپنے ساتھ عمرہ کروانا چاہتے ہیں۔ اس کے احکاما ت کیا ہیں؟
نمبر۵۔ کوئی کتاب جس میں عمرے کے احکامات آسان انداز میں درج ہوں کی طرف رہنمائی فرمادیں۔
جواب
نمبر۱۔ ایسی صورت میں لندن ایئر پورٹ سے احرام باندھ کر جائیں، تاکہ میقات سے بغیر احرام کے گزرنا لازم نہ آئے،البتہ لمبا سفر ہونے کی وجہ سے ممنوعاتِ احرام سے بچنا مشکل ہو ،تو لندن سے احرام کا لباس پہن کر تلبیہ اور نیت کے بغیر روانہ ہو جائیں اور میقات کے قریب نیت اور تلبیہ پڑھ لیں ۔
نمبر۲۔ مکہ مکرمہ پہنچ کر فوراً عمرہ ادا کرنالازم نہیں،لہٰذا ہوٹل پہنچ کر کچھ آرام کے بعد عمرہ ادا کرنا بہتر ہے،تاہم ممنوعاتِ احرام سے بچنا بہر حال لازم ہے،اسی طرح غسل وغیرہ کرنےمیں بھی احتیاط ضروری ہے۔
نمبر۳۔ عمرہ کی نیت کے ساتھ تلبیہ پڑھنا ضروری ہے اور نفل پڑھنا مستحب ہے ضروری نہیں ۔
نمبر۴۔ چار سالہ بچے کو ساتھ عمرہ ادا کروانا لازم نہیں ،اسے ویسے ہی ساتھ رکھیں،اور اگر ترغیب کے لئے عمرہ کے افعال کروالیں تو کوئی مضائقہ نہیں،ایسی صورت میں بچے کا ولی اسکی طرف سے احرام باندھے ،نیز غیر مکلف ہونے کی وجہ سے بچے پر احرام کی پابندیاں عائد نہیں ہوں گی۔
نمبر۵۔ عمرہ کے احکام کے لئے (رفیق حج ۔مؤلف: مفتی اعظم محمد رفیع عثمانی صاحب رحمہ اللہ) کا مطالعہ فرمائیں ۔
فہرست عنوانات
دارالافتاء جامعہ احسان القرآن والعلوم النبویہ
جامعہ احسان القرآن والعلوم النبویہ کا ایک نمایاں شعبہ دارالافتاء ہے۔ جو کہ عرصہ 20 سال سے عوام کے مسائل کی شرعی رہنمائی کی خدمات بخوبی سرانجام دے رہا ہے
سوال پوچھیں
دار الافتاء جامعہ احسان القرآن والعلوم النبویہ سے تحریری جوابات کے حصول کے لیے یہاں کللک کریں
